NE kaketshirtem nem ozüng tsütsü teyari agütsütsü

Jamshedpur, January 10 (Agencies): National Institute of Technology, Jamshedpur nung azünger northeast kaketshirtem nem Institute nung ozüng tsütsü teyari agütsütsü.
District Legal Services Authority (DLSA)-i Honibarnü ozüng tsütsü teyari agütsütsü asoshi cell ka lapoktsüba ajanga northeast kaketshirtem nem ozüng tsütsü angati teyari agütsütsü.
“Onok institute nung engineering azünger northeast nungi nisung 12 shi lir. Iba inyakyim ya NIT ulushia akümtsü inyaktepba mapang ka nung amenokerba lir,” ta NIT-Jamshedpur media coordinator Deepak Chourasia-i ashi.
College osang ka ajanga ashiba agi, ozüngtsütsü teyari agütsüba cell ya ita nung tanabuba aser pezübuba Honibarnü shia lapoka alitsü.
“NIT nung azünger northeast kaketshirtem nem ozüng tsütsü teyari agütsütsü nükjidong nung iba cell ya lapoktsürba lir.” ta DLSA secretary Yogesh Kumar Singh-i ashi.
Yaküm National Legal Services Authority-i Jharkhand State Legal Services Authority dang northeast nüburtem atema iba cell ya lapokjang ta tetuyuba agüba dak ajemdaker iba cell mapa küma lapoktsüogo.
DLSA osang ka ajanga ashiba agi, northeast kintem tangari mesenmetui amshiba tebilemtsü adokba ajanga iba tetuyuba agüja liasü.
NIT nung azünger northeast kaketshirtemji timba ka Assam aser Tripura nungi lir.
“College telung nung ozüng tsütsü teyari agütsüba cell lapokba ya mapang onsara tajung lir ajisüaka tanüngba kintemi northeast nisungtem den tangatetba tajung nung putepa alitsü angatettsüla,” ta northeast nungi mechanical engineering second year azünger kati ashi.
College nung kodanga northeast kintem anemba inyakba matalokdang, ta college ketdangsertemi ashi.

You must be logged in to post a comment Login