NE nem sen crore 1351 aser Nagaland nem crore 197 lemzüktsü

December 5, 2018 nü Kisama nung Rhododendron Resort lapokba sülen Union Minister K J Alphons den Chief Minister Neiphiu Rio na agiba noksa ka angur.

Dimapur, Luchii (December) 5 (TYO): Bodbarnü Kisama nung nikongtsütsü sobaliba sentong nung host ji School Education Advisor K.T Sukhalu aser Horticulture Advisor Mhathung Yanthan na liasü.
Sentong nung tongti tesemdanger Union Minister, Tourism, K.J Alphons liasü aser Director General, National Institute of Rural Development & Panchayat Raj, Ministry of Rural Development, W.R Reddy (IAS)-i tetushi tejaoker ka ama shilem agi.
“Nagaland ajanga linük nung tesüngmangtsü ajak sayur. Sentsü, tsüngsang, sübosolemtsü aser chiyungtsü ajak ya jangratemtsüka lir. Kanga dang teyakyak Chief Minister ya ajaklen lir aser pa lenisüba kübok state azükarua odar,” ta Union Minister for Tourism, KJ Alphons-i ashi.
Centre sorkari Nagaland nung tourism indang mapatong ana atema sen crore 197 endoker. Nagaland state aser North East ajunga atema tarutsüji tourism lir aser Centre sorkari North East nung Tourism sector atema sen crore 1351 agütsüogo, ta paisa metetdaktsü.
“India kübok North East aser talisa Nagaland topur ajungba ama alima nung tesem ka dang mali ama bilemer. Nisung million aika yangi arudaktsünür aser tarutsüji ibaji lir” ta Alphons-isa metetdaktsü.
Union Minister of Civil Aviation den Guwahati nungi Dimapur nungi Kohima aser Imphal. Maneni Imphal nungi Dimapur-i meyipa arutsü asoshi helicopter services tenzüktsü tebilemba ka lemsatep aser pai mulunga agizük, ta paisa shisem.
“Ni Kerala nungi lir aser iba dang ‘Tsüngrem’er li’ ta ajar saka ni bilemer Nagaland ya ‘Tsüngremer kotak lima’ asütsü” ta Alphons-isa metetdaktsü.
Tanü nikongtsütsü sobaliba shilem nung Zeliang troupe-i Heka Lim ( fish dance), Sümi troupe-i Ami Kukulu (fire making) & Aphilo Kuwo (war dance), Yimchunger troupe-i Mükheankhi aser Rengma troupe-i sobaliba ken ka aten.
Art & Culture department-i tanü agi anogo pungububa ‘Cultural Connect’ sentong ayonga agidang Principal Director Investigation, North-East Region Sanjay Bahadur, Principal Commission Income Tax, Kolkata Mithilesh Jha, Ambassador of India to Slovenia Paramjit Mann aser Brigadier Ajay Pasbola nungertem aden.
Tanep Kisama nung sobaliba sentongji Asetkong Ao cultural troupe-i Tsungremong tsüngsang ajanga tenzük. Iba sülen Noksen village cultural society nungi Chang cultural troupe Kaishi Lakshibü ta ser sobaliba ango apuba ia sayu.
Garo cultural troupe-i Rugala ta ser akhidang anü tsüngrem külemba ia sayu aser Khiamniungan nunger Nokhu Noking cultural troupe-i Phen Lou ta ser süngkong tasen yangluba sayu.
Maneni, Zangkham yimtsüng nungi Konyak cultural troupe-i Dee Ahaap Bu ta ser jung amba aser benshiba sayu aser Longsa yimtsüng nungi Lotha cultural troupe-i Otsok Essi ta ser tsük asenba ia sayu.
Tamlu nungi Phom cultural troupe-i Yungho ta ser sobaliba ken ka aten aser Kuki nunger Phangjang village cultural troupe-i Savai Lhun ta ser nokinketeri shi arba jilu sayu.
Tanü tashi nung tourist meyirjang 97 shi kati Kisama nung Hornbill benjung nung denogo.
Benjung tenzüker anogo pungububa tashi nung tesemdanger 97,551 liasü. Parnok rongnung foreigners 1705, domestic tourists 15,325 aser locals 80,521 liasü.
Anogo pungu nung nisung teimba aruba anogoji Deobarnü liasü aser iba anogo nisung 43,079 aru. Nisung tajemtiba arubaji tanü 11,416 dang liasü.