NE nung highway 2 yanglutsü atema Japan-i sen crore 4,000 aputsütsü

New Delhi, January 21 (Agencies) : Japan International Cooperation Agency (JICA)-i Mizoram aser Meghalaya nung highways project ana inyaktsü atema sen crore 4,000 teyari agütsütsü atema nanngzükogo.

Taoba ita Japanese Prime Minister Shinzo Abe-i India semdangba sülen JICA-i sen aputsütsü mulunga agizük.

Iba mapatong ana ya National Highways and Infrastructure Development Corporation (NHIDCL) ajanga inyaktsü aser iba telok ya sorkari hill & border states nung mapa inyaktsü atema tentetba lir.

Mezüngbuba mapatongji Mizoram nung inyaktsü aser iba nung Aizawl aser Tuipang tsüngda NH-54 nung kilometer 380 yanglutsü. Tanabuba mapatongji Meghalaya nung Tura aser Dalu tsüngda NH-51 nung kilometre 40 yanglutsü atema lir.

“Kanga dang kara senotsü teyari agütsütsü nangzükogo. Onoki maneni JICA aser Asian Development Bank nungi sen aputsü mapa inyaker. Sorkari northeast ajungalen connectivity jungdaktsütsü atema alizüng yua lir aser mapatong ajak latettsüba mapang nung inyaktsü” ta NHIDCL ketdangser kati ashi.

Item mapatong atema aser loan agreement atema Cabinet nungi temelaba meshitsü. Gari lenmang 19 yanglutsü mapatongtem atema JICA dang nungi senotsü teyari asüngdanga lir. Onoki Imphal-Moreh gari lenmang atema Asian Development Bank dang nungi teyari meshidanga lir, ta NHIDCL ketdangserisa ashi.

You must be logged in to post a comment Login