NE nung infrastructure talila nüngdaker: Tripura CM

Agartala, September 21 (Agencies): India kübok North East tesem ya linük pungu den arrtsüa lir, anungji item linük den shishilembaba jenjang tajungba akümtsü atema NE nung infrastructure talila nüngdaker, ta Tripura Chief Minister, Manik Sarkar-i ashi.
State ti agi akümba north east tesemi tangar memeneper aser infrastructure shitak melira iba tesem nung aliba ali rongsentem tagitsü küma mamshitettsü, ta anogo asemnü ‘North East Connectivity Summit’ lapokba sentong nung Sarkar-i ashi.
“India den kidangsüa aliba linük pungu den northeast-i arrtsüa lir. Item linüktem den tesentaktep tajung ayutsü atema infrastructure talila nüngdaker. Onoki gari lenmang, train lenmang, power talila nüngdaker aser iba sülen jiang Look-East policy nungi Act East policy ta nüngja melenba nung tetezü alitsü,” ta paisa shisem.
“Bangladesh aser India tsüngda tesentaktep tajung lir aser parnoki asen linük kanga yarir. Ajisüaka, Centre sorkari northeast nung alirtem indang khuret süoki ia mebilemtsüba atema jashir,” ta Tripura Chief minister-isa metetdaktsü.
“Iba tesem nung alirtem sensakertem lir, saka Centre sorkari tebilemtsü onüktem atema timi mapa meinyaker,” ta paisa aitsü.
‘North East Connectivity Summit’ nung northeast state tem dang masü saka Bangladesh, Myanmar, Bhutan, Japan, Russia nungi teshimtet nübotem adener aser iba sentong ya September 23, 2016 nü tembangtsü.