NE nung kiralongra anema raratsüla: Sonowal

Shillong, December 07 (Agencies): Bodhbarnü Assam Chief Minister, Sarbananda Sonowal-i, yimjung alitsü asoshi linük nung North Eastern tesem ya ochimashi, kiralongra aser bendangertem dang nungi talenba salatsüla, ta ayongzük.
Umsaw, Meghalaya nung North East Police Academy (NEPA) 42buba passing out parade sentong nung jembidang Sonowal-i, “Asenoki NE tesem ya ochimashi, kiralongra aser bendanger talenba nungi salatsüla,” ta ashi.
“Asenoki yimjung atema inyaktsüla aser iba atemaji asenoki kiralongra anema raratsüla. Kiralongrartem nokdangtsüji nenok (police) teinyaktsü mapa lir,” ta paisa ashi.
Iba academy nungi Deputy SPs 86, SIs 11 aser Assistant Sub Inspector ka, ta parnok 98 ita aika training agiba sülen graduate süogo. Parnok rongnung Assam nungi 58, Meghalaya nungi ka, Arunachal Pradesh nungi 15, Mizoram nungi 5, Sikkim nungi ka, Tripura nungi 9, Nagaland nungi 7 aser Manipur nungi ana liasü.
Graduate asürtem nem tenüngsang agütsüba den külemi Chief minister-i parnok dang, kiralongra ya tayongzükba tulutiba lir, aser sensotem tetsübu makai yimjung nung alitsü atema kiralongra anema raratsüla, ta ayongzük.