NE nung lisopur teloktem külemi longjemer state takhangba agütsütsü

Guwahati, July 9 (TYO) : National Federation of New States (NFNS)-i teyari agüja Assam aser north east tesem nung kin balala longjemer statehood atema mapa inyaktsü telemtetba agiogo.
Iba telemtetba ya Bodo, Karbi, Kokborok aser Kuki nungertemi tentet aser parnoki NFNS indang northeast chapter ka tentet aser iba telok ajanga parnoki state balaka tentettsü takhangba agütsüba mapa tuluba nung inyaktsü ta metetdaktsü.
“2014 küm Centre nung sorkar tashi marudang BJP-i Bodo nunger aser tanga tribal teloktem indang takhangbatem tenoka shisadangtsü aser telemtetba agitsü ta nangzük. Centre nung sorkar küm ana abensaogo saka parnoki iba dak sendakba nung kecha meinyak” ta Honibarnü All-Bodo Students’ Union President, Promod Boro-i metetdaktsü.
“Bodoland, Vidarbha, Karbi Anglong, Bundelkhand, Gorkhaland, Kukiland aser Tripuraland state tem tentettsü atema takhangba agütsübaji item kintemi pei maitsü kümzüka ayutsü atema inyakba sayur, kechiyong item kintem tangari amokbanger lir” ta Promod Boro-isa ashi.
“Onok state balaka tentettsü atema takhangba agütsüba maparen tuluba nung inyaktsü atema onoki NFNS den teka amtepego. August 15 nü onoki Guwahati nung lokti sentong tulu ka ayongzüka agitsü aser September 1 nungi onoki mapa telatet makai lumai lungkak aiba tenzüktsü” ta paisa shisem.
“Asen linük putiotsü meyipa reprangdangra, nübo agi tangar memenepba teloktemi statehood meshibaji tim dang. Linük Temzüng Arla 1 nung India ji state balala agi akümba linük ka ta shia lir, anungji Linük Temzüng kübok state tasentem tentettsübaji temeten lir” ta Vidarbha Rajya Aghadi Working President aser NFNS central executive member, Swapnajit Sanyal-ia ashi.
“India sorkari Karbi Anglong atema state balaka tentettsü atema olemtep tenzük, saka iba atema kecha meinyak. Linük Temzüng nung Arla 244A kübok Karbi Anglong state ka metentet tashi onoki lungkak aitba sentong tenzükshitsü” ta Joint Action Committee for Autonomous State (JACAS) chairman, Khorsing Teron-ia metetdaktsü.
Kuki State Demand Committee (KSDC)-i Manipur nung Kuki nunger atema state balala tentettsü takhangba agütsüba atema taoba mapang Centre sorkartemi mapa kecha meinyaktsü. Onoki 1969 nung centre sorkar nem mezüngbuba memorandum agütsü saka tang tashi Kuki nunger taginüba matloktsüi lir, ta Hejang Haokip-ia ashi.