NE nung LPG cylinder peria mangur

Guwahati, Rongjui (September) 14 (Agencies): North East Packed LPG Transporters’ Association nung mapa inyakertemi anogo trokbuba lungkak aitba ajanga North East nung LPG khuret ka ajurua lir.
September 9, 2018 nungi mapa inyakertemi Indian Oil Corporation Limited (IOCL) telemtetba anema lungkak aityonga arur.
IOCL-i tender mapa nung profit margin 20% ajemba anema NEPLPGTA nung mapa inyakertemi noktaker.
“IOCL-i telemtetba meyipa magi tashi onoki lungkak aittsü. Assam sorkari onoki akhangba atema mebilemtsür. IOCL kübok aliba distributor ket nung truck gari 55 dang lir aser ibaji North East ajungalen LPGs alemtsü atema meperir” ta NEPLPGTA tatong tir Jayanta Kumar Nath-i ashi.
Nath-isa ashiba agi, “onok telok kübok truck gari 2,200 lir aser garitemji North East ajungalen senzür. Guwahati nung anogoshia truck 30 shi senzür, ajisüaka tang truck gari ajak onok pusema anena lir.”
Assam sorkar dena bangdak ketdangpur aika nem tezülubatem agütsüogo saka parnoki onük menüngdaker ama sayur, ta paisa ashi.
NEPLPGTA-isa IOCL maparen Guwahati nungi Kolkata-i belenba anema noktaker.
“IOCL-i office ajak Kolkata-i belentsü meranger. Onoki küm ana tejakdang iba onük atema lungkak aita liasü. Onoki NEPLPGTA pusema nungiter” ta North East Oil Tankers’ Association nung tongti tezülur Bhaskar Gogoi-i ashi.
Maneni Guwahati nung IOCL osang ka ajanga ashiba agi, lungkak aitertem aser IOCL ketdangpurtem tsüngda olemtepdar.