NE nung menoknok 29 ben anokba ajanga mongintem shisabulur

Guwahati, April 21 (Agencies): Northeast India tesem nung aser alima tesem balala nung menoknok kanga atonga anokba ajanga Seismologist tem kanga shisabuludar.
Northeast India ya seismic risk zone V temaba nung lir aser taküm küm tang tashi nung iba tesem nung menoknok 29 tashi anokogo. Item rongnung menoknok 9 bo Assam tiyongtsü ser anok, iba den külemi mennoknok 5 Manipur nung Indo-Myanmar arrtsülen tiyongtsü ser anoka liasü.
Alima tesem balala nung menoknok lendong kanga bulua atalokba atema shisabulua Gauhati University nungi Aboni Bhagowati-i, “Mapang kanga tetsüngda makai menoknok anokra ibaji shisabulutsüsa lir. Aiben menoknok tesashibo mapang tetsüngda itta manoker,” ta ashi.
Ano Geologist, Ranju Duara-i, “Menoknokji jila metetzüteter. Menoknok anoktsü mesüra manoktsüji shingaia meshitettsü. Saka NE ya seismic zone nung lir asünung, nübur aser sorkari kümdanga alitsü atema mera agitsüji tongtibang,” ta ashi.
Kümshia Shillong Observatory-i Northeast tesem nung menoknok 25-30 shi anokba record asür. Iba dak alia menoknok kanga tila mesüra Richter scale 3 dak tekübokbo record masür. Menoknok timbaka magnitude 4 nungi 5 tsüngda lir.
Manipur nung Indo-Myanmar arrtsülen tiyongtsü ser menoknok aiben anoker. Iba dak alia kanga bulua menoknok tiyongtsü ser anokbaji Morigaon (Assam), Shillong, Indo-Bangladesh arrtsülen aser Arunachal Pradesh lir.
NE tesem nung 1897 küm Shillong nung menoknok aser 1950 küm Assam nung menoknok Richter scale 8.5 shi nung anok, aser ibaji alima otsü nung menoknok tesashi rongnung dena lir. Iba mapang Shillong nung menoknok ajanga nisung 1,542 tashi asü. US nung aliba GeoHazards International-i ashiba agi, ano Shillong nung taoba mapang ama Richter scale 8.3 nung menoknok anokra 1897 küm anokdang nisung asüba dang nungi 60 ben agi nisung tali asütsü, ta metetdaktsüogo.