NE nung nüjiso atema rarar tenüng nung sempettem agütsü

Nagaland Governor P.B. Acharya den sempet angurtem agiba noksa angur. 

Dimapur, March 15 (TYO): University education ya loktiliba aser linük tenzükba tsütsü asütsüla ta Nagaland Governor P.B. Acharya-i ashi.
New Delhi nung tanü NAMASTE Governor Acharya Award 2018 agütsüba sentong nung pai iba tayongzükba agütsü.
“NAMASTE ta asüba ya N-North/Nagaland, A-Assam, M-Manipur/Mizoram/Meghalaya, A-Arunachal Pradesh, S-Sikkim, T-Tripura aser E-East lir” ta P.B. Acharya-i metetdaktsü.
Iba sempet ya North East India nung nüjiso atema rarartem nem tetushi agütsüba lir aser Special Centre for the Study of North East India, JNU-i ayongzüka agi.
Sentong nung mendenji JNU Vice Chancellor Prof. M. Jagadesh Kumar liasü aser special centre lapokba nung pai shilem tulu agia liasü.
JNU nung iba ama sentong ya tang mezüng atema agir aser maneni Northeast ajungkettsü aser ayongzüktsü nüngdak, ta Prof. M. Jagadesh-i ashi.
“Küm shia North East India nung state tem nungi nüjiso atema rarar nisung pungu ateam sempet agütsütsü” ta Special Centre for the Study of North East India, JNU Chairperson Prof. Bhagat Oinam-i ashi.
Iba sempet atema Governor P. B. Acharya-i patron inyakba atema paisa pelaba metetdaktsü.
Sempettem atema tetoktepbaji MPhil aser PhD researches nung ajemdaker liasü. JNU kaketshirtemi NE nung tebilemtsü aser khurettem indang research agi.
Taküm sempet angurtemji Aditya Bordalai, Gaithoilu Gangmei, Md. Chingiz Khan, Munmi Pathak aser Sikha Dutta nungertem liasü aser parnoki U Tirot Sing (Meghalaya), Rani Gaidinliu (Nagaland), Bir Tikendrajit Singh (Manipur), Lokpriya Gopinath Bardoloi (Assam) aser Pasaltha Khuangchera (Mizoram) nungertem indang research agi.