NE nung Pawan Hans helicopter service anentsü akhanger

Guwahati, August 16 (Agencies): Tesüiba küm pongu tsüngda Arunachal Pradesh nung Pawan Hans helicopter asem tsüokba lendong nung taoba mapang state Chief Minister Dorjee Khandu densema nisung 27 tashi süogo, aser item tatalokba nung ajemdaker state nung kaketshir tentet tulutiba, All Arunachal Pradesh Students’ Union (AAPSU)-i state nung Congress sorkar dang Pawan Hans Helicopter Ltd (PHHL) indang ‘tasümang süngden ayimba anendakjang, ta khangdagi.
Arunachal Chief Minister Nabam Tuki’er sorkar dang PHHL den tezüngzüktep agia alibaji tangsa thinenang ta takhangba agüja AAPSU-i, “Asen state nung Pawan Hans Helicopter Ltd ya tasümang süngden tayimtsü den kasa kümogo,” ta ashi.
“Taoba mapangtem nung lendong kar atalokogo, aser item tatalokba ajanga sorkar ayip janga mejanga aliba nungi saaktsü mapang tongogo. Ajisüaka tesüngmangtsü kaji, tasümang süngden ya tang tashi ayimer,” ta parnokisa ashi.
AAPSU-i ashiba agi, tawa August 4 nü Tirap district nung atalokba lendong ajanga iba helicopter service majungba kuli maneni sayur. “Iba tatalokba ajanga asen state nung amshiba helicopter ya tenem lima nung ayimtsü metemsü ta temaitsü sayur.”
Item tatalokba ajanga Meghalaya nüburtema tsübuteber.
2004 küm Meghalaya yimtiba, Shillong anasa Pawan Hans helicopter ka tsüokba lendong nung Cabinet minister ka aser MLA ana densema nisung ter tashi asü.
Northeast nung Arunachal aser Meghalaya na dak alia, Pawan Hans Helicopter service ya Nagaland, Tripura, Mizoram aser Sikkim state tem nunga lir, aser küm shia license melener.
Northeast nung PHHL shilem 75 subsidy Ministry of Home Affairs-i agütsür. Iba nungji passenger sen maden aser tanüngba shilem 25 ji state sorkari agütsür.
NE nung Pawan Hans helicopter lendong balala: September 22, 2004 nü Shillong anasa Pawan Hans helicopter lendong nung Meghalaya Community & Rural Development Minister, Cyprian R Sangma, MLA tem aser taoba mapang Deputy Speaker nunger asü.
August 6, 2010 nü Arunachal, Namsai nung helicopter anünglen feet 10,000 tema nungi nisung ka tsüka asü.
April 19, 2011 nü Pawan Hans Mi-17 helicopter ka Tawang nung anentsü merangba mapang tsükoka yangji mena alir nisung 23 nungi nisung 17 iba tesem nungjisa asü aser nisung ana tesülen asü.
April 29, 2011 nü Tawang district kübok Sela Pass nung Pawan Hans helicopter lendong ajurua taoba mapang Arunachal Chief Minister, Dorjee Khandu den nisung pezü tsükseta asü.
Tang tesüsa August 4, 2015 nü Pawan Hans helicopter nung Tirap DC, den pilot ana süogo.