NE nung R-Day matong tashi passenger train masü pilot engine tama jajadaktsür

Guwahati, January 25 (Agencies): Brehostibarnü Republic Day benjungmong amongtsü sentong aliba mapang ka nung, Northeast Frontier Railway (NFR) ajanga nüburtem train nung jajaba mapang lendong balala nungi kümzüktsü asoshi nisung amenba train mejajatang pilot engine tama jajadaktsür.
Northeast nung telungpurtemi Republic Day amongtsü nokdangba osang sangdongba sülen iba sentong ya yanglua inyaker. Telungpurtemi train lenmang raksatsütsü sentong alitsü südi ta temolung malemba ajanga iba sentong ya tenzükogo.
Northeast nung passenger amenba tongtibang train mejajatang pilot engine ya Srirampura – New Bongaigaona – Kamakhya, New Bongaigaona – Goalpara Towna – Kamakhya, Fakiragrama – Dhubri aser Guwahatia – Lumdinga – Tinsukia aser Dibrugarh tesemtem nung January 24 nikongdang 5:00 ako nungi tenzüka January 26 anepdang 6:00 ako tashi jajadaktsütsü, ta NFR nung Chief PRO, Pranav Jyoti Sharma-i metetdaktsü.
“Tongtibang apu ajak nung mitkartemi kanga junga nüktagi, aser mitkar indang azü anir item temeket ajunga nung mita bushitagi,” ta Sharma-i ashi.
Tinsukia, Lumding, Guwahati, Rangiya aser New Bongaigaon tesemtem nung Railway mitba osangtem agitsü asoshi Joint control room lapoka lir.
“RPF ketdangsürtemi tongtibang station tem nung CCTV inoka reprangtagi. Motor trolleys aser tetsüng agi mitkartemi tesem balala sema jajatagi,” ta paisa shisem.
Railway Protection Force (RPF) indang Quick Response Team balala tenzüker tongtibang railway anendak tesemtem nung lir.