NE nung regional party tejentibaji NPF lir: KG Kenye

Dimapur, Chiteni/July 25 (TYO): Brihostibarnü Naga People’s Front (NPF), secretary general aser Rajya Sabha MP, KG Kenye-i, Northeast nung regional political party tulutibaji NPF lir aser Tamil Nadu nung DMK sülenbo India nung tanabuba jenjang nung regional party tejentiba lir, ta metetdaktsü.
Tanü Landmark colony, Dimapur nung NPF Dimapur division building tasenba semzüktsüba sentong nung jembidang Kenye-i, “Iba senmang amangba atema asenok kanga tia kar, anungji party nung inyakertemi ibaji meraksatsütsüla saka iba milenji amer tarutsü putu nem senmang agütsütsüla,” ta ashi.
Kasa sentong nung jembidang NPF Tir, Shurhozelie Liezietsu-i, “Yimtenren party kati tensa balala nung litettsü atema angazüktsüla. Party nung inyaker shiai pei tangatetba nung nokdaktsüla, aser Naga nunger ajungtsü atema inyaktsüla,” ta ashi.
“Tang NPF-i takoksa kar ajurua alitsüa akok, saka onoki shisa mebulur. Iba ya khenpiga atema dang lir. Tesüiba mapangtem nung yimtenren party aika tentetogo saka ajak samaogo. NPF-i Naga nunger atema inyaktsü,” ta pai metetdaktsü.
“Tanü NDPP-i BJP den külemi senteper state yimsüsür, ajisüaka tanga regional party tem ama parnoka ano samatsü,” ta Shurhozelie-isa ashi.
Kasa sentong nung MLA, Kuzholuzo (Azo) Neinu, NPF tatong Tir, Pusazo Luruo aser taoba mapang NPF secretary general, Chubatemjen nungeria o tatsütsü jembia liasü.
Sentong tetenzüklen Lotha Baptist Church Dimapur nung senior Associate Pastor, Yanbemo Ovung-i iba building meshiteta sarasademja liasü.