NE nung tamang aini aor atema train ka Feb, 17 nungi senzütsü

Guwahati, January 13 (Agencies): Raliwalir nüngtem nung semzükba train ka February 17 nü Guwahati nungi tenzüka eastern sector nung tamangba yimsü dak sendakba tesem balala sema tamangdir anir jajatsü.
‘Aastha Circuit Tourist Train’ nung sleeper class, tesem balala sema jajaba mapang chiyungtsü (Vegetarian), takdangtem aser tesem balala sema jajatsü asoshi non-AC tourist bus agütsütsü, ta IRCTC ajanga metetdakja liasü.
“Iba sentong ya balaka lir. Iba train ajanga raliwalirtem Gangasagar, Sri Swamy Narayan Temple, Kalighat, Birla Temple, Sri Jagannath Temple, Konark Temple aser Lingaraj Temple tesem sema anir jajatsü,” ta IRCTC (East Zone) nung group general manager, Debasis Chandra-i metetdakja liasü.
Iba train ya Kamakhya, Alipurduar, New Cooch Behar, New Jalpaiguri, Malda, New Farakka, Pakur, Rampurhat aser Bolpur tesemtem nung anentsü.
“Train jajaba mapang coach ajak nung tanüker, train superintendent amai IRCTC ketdangser ka aser osang metetdaktsütsü asoshi public address system alitsü,” ta Chandra-i ashi.
Guwahati nungi tenzüka tesem shimteta aliba ajak sema jajar tanaben meyiba aruba nung aonung trok aser anüngdang tenet agitsü.
Passenger ajak dang iba senzüsempongba taa sen 6,161 meshitsü. Raliwalir iba tesem repranga senzütsü jangrartemi www.irctctourism.com nung mesüra e-ticket agent tejangja aser IRCTC office nungi ticket mekazüktsü akok.
Assam aser Northeast semdanger tourist tali rendaktsütsü asoshi iba mesükba train ka India tesem balala nungi NE-i arutsü, ta Chandra-isa shisem.
“Iba train mezüng jajaba ya asadangtsü aser iba sülen ang tanabuba Aastha Circuit Tourist train senzütsü asoshi lemtettsü,” ta paisa metetdaktsü.