NE nung Technical Education indang 4 buba Regional Workshop tenzükogo

Kohima, Rongchii (April) 7 (TYO): Lanurtem sayutetba nung technical education-i tongtipang shilem agir aser tensa den apet technical institution aser polytechnic tem nung course tasentem tenzüktsüla ta Chief Minister, Neiphiu Rio-i ashi.
North East State tem nung Director aser Principal tem atema Technical Education indang 4 buba Regional Workshop nung Higher & Technical Education Minister, Temjen Imna Along-i Nagaland chief minister indang osang zünga metetdaktsü.
Iba sentong ya Department of Technical Education, Nagaland-i ayongzüka Hotel Vivor, Kohima nung agir aser National Institute of Technical Teachers Training and Research (NITTTR) Kolkata-ia teyari agütsür.
Nagaland aser North East State tem nung Technical Institution aser Polytechnic tem lapoktsüla aser tanü tensa den apet course tem agitsüla. Iba atema Technical Institution tem nung facility tem tajungba kümdaktsütsüla aser faculty o tesayurtem training aser reorientation agitsüla, ta Rio-i ayongzük.
Tanü alima nung tajungtem rongnunga tajungtibatem ang alitsüsa tensa ka nung asenok alir anungji asenoki technical education nung temulung agütsütsüla ta Minister Along-ia o jembidang ashi.
Nagaland nung PDA sorkari iba onük atema süoki ia bilemer aser Chief Minister Neiphiu Rio-i anogo 100 tsüngda wadang kar nung temelenshi adokdaktsütsü atema alizüng yua lir, ta paisa ashi.
North East nungi sempet aketba lanurtem jungkai adoka sayutsüla. Tarutsü nung raraji bomb aser injangtem agi masü saka rongsenren, sobaliba aser lokti inyaksangshi agi dang raratsü, ta Imna Along-isa shisem.
Lanurtem ya linük yangertem lir aser asenoki asen polytechnics nung tanurtem timi manitetra asenoki tangar den metokteptettsü. Anungji iba workshop nung adenba principal aser director temi tesayuba tasen ajanga lanurtem ajungmesotsü ayongzüker, ta paisa metetdaktsü.
North east nisungtem ya ajemalu aser nüma tatangtem lir aser linük asoshi mapa inyaktsü mulunga lir. Anungji, Union Ministry of Human Resource Development-i North East yaritsü mepishir aser onokia meyiper linük yaritsü, ta Along-isa shisem.
Sentong nung NITTR Kolkata nungi Workshop Coordinator, Prof. Samiran Mandal-i ashiba agi, “tesüiba mapang Technical Education System nung sendaka alirtemi Quality Education, Employability, Accreditation aser tanga onüktem nung tayongzük aika ajuru.”
State 8 adenba North Eastern Region nung tenüngdakba balaka lir aser iba atema teyari balaka nüngdaker, talisa Human Resource nung teyari nüngdaker, ta Prof. Samiran-isa ashi.
Iba nung ajemdaker NITTTR Kolkata-i North East atema Technical Education System indang Regional Workshop agir, ta paisa shisem.
Iba workshop nung North East state tem nung aliba Polytechnic temi ajuruba khurettem metettsü merangtsü aser Technical Education System renloktsü atema tebilembatem bendentsü, ta paisa metetdaktsü.
Iba workshop ya Rongchii (April) 9 nü tembangtsü.