NE nunga bank maparen nung timtem ajurur

Guwahati, January 31 (Agencies): India nung bank union temi onük 11 takhangba agüja, tanü nungi tenzüker anogo ananü lungkak aittsü ayongba ajanga linük ajungalen bank maparen nung timtem ajuruogo.
Hokolbarnü Northeast nunga bank tulu teimba ka shibangba ajanga bank maparen nung timtem ajurua liasü.
Northeast state tiprong nung bank nung mapa inyakertemi takok ngua shilem agir, ta tanishirtemi ashi.
Tanü lungkak aitdang NE kübok state 8 nung nationalised bank balala nung mapa inyaker nisung 80,000 temai shilem agiogo, ta tanishirtemisa ashi.
UFBU-i pension scheme tasenba agientsü aser contract employees o business correspondents atema kasa mapa atema itasen kasa agütsütsü akhanger, ta United Forum of Bank Unions (UFBU) lennir Jawaharlal Dey-i ashi.
Regional Rural Bank balala nung inyakertemi lungkak aitba nung adener saka State Cooperative Bank tem nung inyakertembo madener.
United Forum of Bank Unions (UBFU)-i anogo ananü (January 31 aser February 1) anogotem linük ajunga mokdangtsü ayongzük. Talisa, February 2 Deobarnüa bank tem melapoktsü.
November 2017 nungi bank nung mapa inyakertemi itasen ajungkettang ta takhangba agüja arur.
UFBU nung bank union 9 dena lir aser teloktemji- All India Bank Employees’ Association (AIBEA), All India Bank Officers’ Confederation (AIBOC), National Confederation of Bank Employees, All India Bank Officers’ Association, Bank Employees Federation of India, Indian National Bank Employees Federation, Indian National Bank Officers’ Congress, National Organisation Of Bank Workers and National Organisation of Bank Officers lir.
Indian Banks’ Association-i takhangba onüktem atema telangzüba tajung magütsüra, anogo asemnü (March11, 12 & 13, 2020) lungkak aittsü aser April 1, 2020 nung mapang telatet makai lungkak aittsü, ta UFBU-i metetdaktsüogo.
Tanü lungkak aitba ajanga Mumbai, Chennai aser Delhi nung Rs 23,000 crore shi asadangtetba cheques lakh 31 tashi magizüktet, ta All India Bank Employees’ Association (AIBEA) general secretary CH Venkatachalam-ia metetdaktsü.
Kasa khuretji Northeast nunga ajuruogo aser sen lakh aika alang cheques magizükteti yua lir.