NE nungertemi Citizenship Bill tasenba agizüktsü

Guwahati, September 25 (Agencies): Taküm November ita Parliament session nung Citizenship (Amendment) Bill benoktsü aser Northeast nungertemi iba bill indang draft tasenba agizüktsü, ta Assam Finance Minister Himanta Biswa Sarma-i Mongulbarnü metetdaktsüogo.
Bill tasenba ajanga Arrla 371 aser Sixth Schedule nem timtem kecha magütsütsü aser lisopurtem sobaliba, oshi aser maitsü kümzüka ayuba ozüngtem nung mekongshitsü, ta Sarma-isa ashi.
Northeast kübok state kar nung tenzüka aliba Inner Line Permit (ILP) system nunga iba Bill-i timtem kecha magütsütsü, ta paisa shisem.
Northeast nung state ozüngtemi lisopurtem, oshi aser sobaliba kümzüka lir. Centre-i tang yangluba Bill tasenba ajanga item ozüngtem nung mekongshitsü, ta Sarma-i metetdaktsü.
Citizenship (Amendment) Bill, 2016 ya Bharatiya Janata Party (BJP)-i Parliament nung benok saka house anaprong nung magizüktetba ajanga iba Bill indang mapang süiadok.
Ajisüaka, BJP-i taküm Centre nung tanaben tashi anguba sülen CAB tanaben benoktsü ta sangokja liasü.
Sarma ya BJP-i aniba North East Democratic Alliance (NEDA) nung convener lir aser paisa ashiba agi “ozü party-i northeast nung telok balala den CAB atema olemtep tenzükogo.”
“BJP lennir tejentemi northeast semdanger aser telok balala den ajuruteper. Parliament indang taruba session nung CAB dak sendakba maparen tembanger alitsü atema, taruba ita BJP lennir tejen talila arutsü” ta paisa metetdaktsü.
“Tawa National Register of Citizens (NRC) list sayaba nung BJP-i mepelar aser NRC maparen ajunga meyipa reprangshitsü atema onoki Supreme Court dangi aotsü,” ta Sarma-isa ashi.