NE nungi AFSPA agientsüla: Amnesty Intl

Guwahati, July 12 (Agencies): Union Home Minister-i Northeast nung Central sepaitem yoka aliba ajemtsü asoshi jembiba sülen anogo ka lir tanü Amnesty International-i, NE state tem nung Armed Forces (Special Powers) Act tashi amshiba asoshi bilemdangtsüla, ta shiogo.
“July 11 nü Northeast state tem nungi Chief Minister tem den senden amenba mapang Home Affairs Union Minister Rajnath Singh-i tesem nung security tensa tajungba kümer asünungji central sepaitem ajema akümtsü lenmang lir ta o lemtep kaogo,” ta Amnesty International India Media Officer, Himanshi Matta-i sangdong ka ajanga tanü metetdaktsü.
“Shisabulutsü kaji, northeast state aika nung benoka aliba AFSPA, 1958 onük nung olemtep maliasü,” ta kasa sangdong ajanga ashi.
Amnesty International India-isa, “Makmanü benshibatem anema ozüng reprangshitsü asoshi tentetba, Justice Verma Committee-ia, AFSPA ajanga makmanü aibelen benshitsü asoshi lenmang lapoktsür ta shiogo,” ta ashi.
“Tetsürtem anema benshiba aibelen aser meimchir temeten pusemba telok UN Special Rapporteurs densema International tentettem aser mongintemi iba ozüng (AFSPA) agientsü asoshi jembiogo,” ta kasa sangdong ajangasa shisem.