NE nungi DU nung züngnertem yaritsü atema Students Union temi ‘help desks’ lapokogo

New Delhi, June18 (Agencies) : Northeast nungi Delhi University nung arua azüngtsüpur college tajungtiba shimba nung yariteptsü tebilemba tajung nung student tentet aser union balalai lanurtem admission agiba nung yariteptsü asoshi help desk lapoka lir.
Northeast nungi lanur aikati Delhi University kübok college tajungtiba nung züngner aser iba nung yariteptsü atema student tentet aser union balalai parnoki akokba tashi nung lanurtem nükjidong tongdaktsütsü atema yariteper.
“Onoki lanurtem den tongteprateper aser parnok nem college tajung balala indang osang tejangja agütsür,” ta All Assamese Student Association (ASA) nung züngsem Parash Moni-i ashi.
“Lanurtemi parnok kechi aser kong azüngtsüar meshimtetteti kanga mangmangteper. Onoki parnok nem osang tejangja agütsür aser ibaji ajanga lanurtem bilemba aika nung yarir,” ta pa shisem.
Moni-isa, onoki kaketshir aika form fill up asüba nung yarir kechiba süra tesüiba kümtem ama masü saka 2016-2017 küm atema undergraduate tem asoshi form ajak online ajanga dang fill up asür, ta ashi.
Assam nungi kaketshir, Sarangapani Buragohain Dibrugarh college nung Bachelor of Arts degree temer külen geography nung post-graduation agitsü atema Delhi alu. Pai Assam Students’ Union teyari ajanga Delhi University college aika nung form agütsüogo.
“Asenoki memetetba telemsa aika lir. Ni television ajanga north-east students’ tentettemi New Delhi nung ‘admission help desk’ lapoka kaketshirtem yariba metetba sülen parnok den tongtepratep. Parnoki ni kanga yariogo,” ta Sarangapani-i ANI dang ashi.
Iba den saku ano Naga Students’ Union, Delhi-ia Nagaland House nung hopta ka atema helpdesk lapoka online ajanga registration agiba nung yaritep.
Naga Students Union Delhi Tir, Phungshok khonreiwoshi-i, “Kaketshiretm timtem melii online ajanga form agütsütsü atema iba sentong ya onoki küm shia lapoker,” ta metetdaktsü.
“Küm shia kaketshir noklang aiyi Delhi-i tazüngtsü atema arur aser parnok online ajanga form fill up asüba mapang kanga timtemteper. Anungji Naga Students’ Delhi-i ibai lokti asoshi onok teinyaktsü ta angateta küm shia iba sentong lapoker,” ta pai shisem.
Delhi University kübok college balala nung züngner aikati taküma iba sentong ajanga teyari agiogo.
“NSUD teyari ajanga ni online nung form kanga mela fill up sütet aser ibaji atema parnok dang kanga pelar. Ni economics honors agitsü atema tenüng agütsüogo aser Saint Stephens mesüra SRCC ama college tajung nung seat nguner,” ta Manipur nunger kaketshir Vincent-i ashi.
Admission agitsü pur mapa kara temdangtsütsü mechi Delhi nung aliba Student union temi laptop, Wifi service, scanner aser printer ajak angadi amshidaktsür.
Delhi University kübok tang ya college 70 dak tema lir.