Ne O Metenjang ma, Nagaland BJP

  – Wapangrenba Imchen.

April 26 Bodbar anogo Mokokchung BJP office nung par tongti zülur Longshi Kikon-i BJP state minority morcha yimlusü tenzüka jembidang, BJP telokji Khristiantem aser Khristian yimsü anemer telok ka ta tai tangatetba terataji aidoker linük terenlok asoshi dang alitsü ayongzük. Anosa pai ashi, BJP-i India temzüng kübok nüji temeten jenjang koba nisung shia nem agüja ali, ibaji akümtsübua aser wazüka yur dang inyaksangshir. India lima BJP sorkar kübok tatalokbatem aser bangzüng balala renema inyakba repranga Nagaland nung BJP ketdangpuri jembibaji An-i scü chir tebang shidok ama repranger aser angar, kechiba süra kulitem jenti agi par o aser inyaksangshi memetentsür. Saka O agi bangzüng azünger aser aji mapa agi inyaktet nungang iba bangzüngji renemer aser shiri iba bangzüng renem par lokti aser takumji metener asünung, kechi Nagaland BJP-i jembir, amanger aji pari liteta nübur dang sayutetsü.
BJP teloki Indian temzüng kübok nisung shia juri temetenji wazükja yua aser akumtsübua awashir ta jembir saka nisung dang nungi nashi nemang akhum tuluba agüja, nisungbo yiruyunga kecha masü nashibo kumzüktsüla ta mapai sayur. April 24 anogo nungang ano supreme court nung nashi shia nem adhaar mesükba nashi nema Unique Identification Number agütsütsü terenemba agitsü BJP sorkari zülu, iba ya samesa sayatenyatsü tangatetba aser mapa. India lima nashi metepsetsü aser nashi shi machitsü shiri aibelener temerenshi angutsü ozüng agütsür. Kar badaki aor aser kar tasütsü temerenshia angur. Tawaang Assam Karimganj district nung nisung ana nashi tepsetba agi police-i apu aser ano auer tonglokja merenshi. Nisung ka juri temetenji taküm alitsüba aser chiyunga jemerang taküm kaji alir. Nashi metsüa iba nungi nisung ka taküm alitsü asoshi tajangzük agia aliba ya meimchir sobaliba aser libaliro nung kum meyirijang aikasa. Saka BJP sorkar ozüng yagi nisunger luyim ka ajioda taküm alitsü temeten ka aidoktsür. Shiruru tim mesüi nisung südoksünemtsü asoshi kangshiba (tatishitsü agi, taküm dang tekup asaba, tetsüng leptoktsüba etc.) atemabo nokdakang kechiaser teyanglubatem madak kibur süa ano anepalutsüji nisunger temeten saka shiruru meji nisung ka takum alitsü temeden ajemrepba ya tai.
Government mapa inyakdak aser school-tem nung yoga agidaktsür. Ozüng agi masü tabo ashir saka tesayuri aser temaba menden nungi ozüng süa ashirji iba ya tashiyim mapa aser nisung ka temeden anema inyaker. Prof. Sundra Singh kaket ‘Yoga an introduction’ nung zulu, Hindu nunger kaket ajanga ashiba agi, yoga ya par tsüngrem shiva ajanga tenzük aser iba ya India nunger akhi tejen yimsoshiba mapang küm 5000 tema Vedic mapang nungi par tekülemba yimya nung benshia aru. Khristan ka asoshi telumiba mesüka yogaji shidakba agi Hindu nungeri ‘Om’ ta asa-a sarasademba aser tanela azüokba yimya ka. Kodang iba yoga ya yimersen(compulsory) süa lim nung benoker nisung ka temeten anema aser Indian temzüng anema BJP-i inyaker.
Indian temzüng Arla 25 nung nisung kati tamangba yimsü pei temeten süa benshitsü aser amangtsü shia lir saka ‘ghar wapsi’ sentong koba ajanga India nunger ajak hindu dangi meyipdaktsütsü sentonger iba ya tai aser BJP teloki benloker. Tamang yimsüji prangpong aser nok aser ozüng kübok tashiyim agi kangshia benshidaktsütsü tamakoktsü, kechiaser iba ya nisung ka juri taküm nung tajangshiba aser tanela tejembiba ajanga lir. Maneni BJP teloki Khristian yimsü benjong tem apir sorkar mapadong balala ayonger. Khristmas benjongdi anogo nung Good Governance day amongtsü sorkari latet, Digital Indian Week ano passion week mapang amongtsü lateter, kechiba Khristantem tekülem sentong raksatsütsü aibendang sentonger? Tebilemdangtsü ka.
Meimchir lokti tentet ka teinyaktsüji raren(identity) wazüka ayutsü, ajioda semchisemnur asoshia iba raren ajang temeden kadaktsütsü inyaka aruba süiren jagi metentsür. Na/ni tanü BJP telok nung kechi tangatetba aser nukjidong nung aden aser adentsü lemteter lanlia asü mesüra aiatai bentsütsü teshisadangtsü ka. BJP state minority morcha yimlusü sentong Mokokchung nung semzükdang nür telok metenja jembiogo süra ner mapa agi ajioda metenjangma. Aor-i Khrista Edward Winter Clark ajanga ajuru aser Naga kin balalai Aor ajanga Khrista ajuru süra Tsüngremi Aor samanir süa maongka agüja shimtetba rarenji koba tashika wazüktet? Aser Tsüngremi kechiba Aor nem iba maongka agütsü ta pela-a bilemer aser ano khuret süa bilemdanger. Jungkai Adok 2:4, “Saka ne mezüng temeim nai toktsü nung na anema ni ya kar.” India lima temeyoktep sobaliba nung asen tia kar maka par dang nungi shilu balaka sürnung tensemji politically correctness-ji aser tangar den yimjung nung alitsüjia angazükdi saka asen Aori Khrista koba tashi ka agizüktet aser tarutsü lanu putu nem tanü mapa agi asüng kechi sempetsütsü, kanga shisadanga meratem agidi.