NE Resident Commissioner tem senden amen

Dimapur, Chiteni (July) 27 (TYO): India kübok North East state ajak nungi resident commissioner tem indang senden ka Nagaland house R .K Puram New Delhi nung tanü amen.
Northeast renloktsü atema tebilembatem lemsateptsü atema iba senden ayonga amen aser mendenji Nagaland indang chief resident commissioner, Dr. D. K. Bhalla IAS liasü.
North East state aika senotsü tsütsü metokmeperi aliba state tem lir aser tanü senden nung iba onük tongti süa jembi. State temi Centre sorkar dak dang senotsü teyari meimlai pei sasa inyaktettsü atema tebilembatem lemsatep.
North East tesem nung terenlok mapa inyaktsü atema corporate houses-i parnok CSR funds amshiba ajanga state tem senotsü aazüktsü aser corporate sector-ia north east state tem mapa talila awaloka oa inyaktettsü akok ta Dr. D. K. Bhalla-i tebilemba ka shidang.
North East state tem ya süngdonglidong aser shiruru nung takar tesemtem lir aser iba ya ajanga tourism mapa tajungba inyaktettsü aser senotsü aazüktettsü. NE nung Medical tourism, golf tourism, anthropological tourism, ecological tours, adventure tourism amala inyaktettsü akok, ta paisa ashi.
Tourism dak sendakba mapatongtemji PPP model nung inyaktsü akok aser iba nung state sorkartemi ali aser tanga rongsen agütsütsü akok aser nijatemi India sorkar den yaritepa senotsü enoka inyaktsü akok, ta paisa shisem.
NE state tem nung rongsen jenti lir anungji 15th finance commission-i iba asoshi sen talila lemzüktsü mepishitsü atema resident commissioner temi lemtet.
Resident Commissioner temisa northeast nung mega projects aika bener arutsü aser farming sector o horticulture dak sendakba mapatongtem inyaktsü atema senotsü teyari agütsü junger ta jembitep.
Northeast atema dang NE bank lapokba, Special loan assistance agency o Insurance agency tenzükba ajanga kanga renloktsü ta parnokisa jembi.
Northeast state tem nungi Resident Commissioner tem iba dak sendakba nung mapatong ka yanglutsü aser ibaji Prime Minister dangi abentsü lemtet.