NE sorkartemi mapa adokdaktsütsü atema inyaktsüla : Kalraj Mishra

Imphal, April 9 (TYO) : Manipur aser tanga North-East state tem nung aliba sorkartem asoshi tongtipangtiba teinyaktsüji mapa adokdaktsütsü aser telungpur noktangtsü lir, ta Union Minister for Micro, Small and Medium Enterprises(MSME) Kalraj Mishra-i Honibarnü metetdaktsü.
Honibar nikongtsütsü Imphal nung mezüngbuba Manipur Industrial Expo, 2016 lapoktsüdang Mishra-i iba onük jembi.
Taoba mapang Manipur nung mapa adokdaktsütsü makok aser Manipur nunger dak aliba sempet ajungkettsü atema mapa meinyak, ta paisa ashi.
Loktiliba nung teraksa adokdaktsütsü atema linük anema inyakertemi asen zünga-meteta aliba lanurtem anisatsü meranger, ta Mishra-isa ashi.
Sorkar asoshi tongtipangtiba teinyaktsüji telungpur maparen noktangtsüba lir, ta paisa shisem.
Iba sentong nung Union Minister of State for MSME Giriraj Singh, Manipur Chief Minister Okram Ibobi Singh, State Commerce & Industries Minister Govindas Konthoujam aser MSME nung ketdangsertem aika aden.