NE state 3 nung tzümetsüng timtem ajurutsü; IAF-i nisung 200 dak tema kümzük

Itanagar/Guwahati/Shillong, (Luroi) August 31 (Agencies): Hokolbarnü Air Force-i Arunachal Pradesh nung nisung 19 tashi tzümetsüng nungi kümzük aser parnoki Assam nunga nisung 200 dak tema anien.
China nungi tenzüka ayimba Siang ayong nung tzü mesemi ayimba ajanga Assam kübok Dhemaji district nung tzümetsüng timtem ajurua lir.
Maneni, Meghalaya kübok district asem nunga tzümetsüng timtem ajurutsü ta kümdangtsü osang ka metetdaktsüogo.
Siang ayong ya Tibet nungi tenzüka ayimer aser China nung Tsangpo ta ajar. Iba ayong ya Lohit aser Dibang den ajuruteper Assam nung Brahmaputra ayong akümer.
Tanü Arunachal kübok East Siang district nung kümzükba nisung 19 ji Assam nungi shiruru metsürtem lir. Parnok ghonda 24 shi ka tzü agi meketbanger liasü aser district administration-i mepishiba sülen IAF-i kümzük, ta deputy commissioner Tamiyo Tatak-i ashi.
Iba mapa ya Arunachal Pradesh Chief Minister Pema Khandu-ia Itanagar nungi mita reprang aser Lok Sabha MP Ninong Ering o Pasighat West MLA Tatung Jamoh na den police aser local temi shirurutem kümzük.
Nisung 200 ji National Disaster Response Force aser Assam State Disaster Response Force züngsemtemi kümzük, ta Dhemaji administration-i metetdaktsü.
China sorkari sangdong ka nung ashiba agi, tzünglu kanga aruba ajanga Tsangpo nung tzü mesemi ayimer aser gauge & discharge stations-i Bodbarnü 9,020 cumec water yimdok.
Arunachal Pradesh kübok East aser Upper Siang district tem aser Assam kübok Dhemaji, Lakhimpur aser Dibrugarh district administration temi yashi nungi tzümetsüng timtem ajurutsü indang osang metetdakja liasü.
Arunachal kübok Seram-Ramku yimtsüng nung tzümetsüng ajanga ki 15 raksatsüogo ta
East Siang MLA Lombo Tayeng-i ashi. Takoksa ajurur kibong shia nem sen lakh 1 teyari agütsütsü ta paisa shisem.
Paisa, Union Minister Kiren Rijiju dangi osang sangoktsüogo aser inter-ministerial central team ka arua tensa reprangtsü atema mepishi.
Lakhimpur aser Dibrugarh district administration temia Brahmaputra ayong nung tzü talila yimokba atema kümdangtsü metetdaktsüogo. Parnokisa Inland Waterways department dang rongtem renema atatsü tetuyuba agütsü.
Meghalaya nunga West Garo Hills, North Garo Hills aser South West Garo Hills nung deputy commissioner temi kümdangtsü osang metetdaktsüogo aser taruba ghonda 24 tsüngda disaster management teloktem renema atatsü tetuyuba agütsü.