NE state asem Foundation Day mungogo

Agartala/Imphal/Shillong, January 21 (Agencies): India northeast nung aliba state asem- Tripura, Manipur aser Meghalaya state temi Brihostibarnü sentong balala ayonga Foundation Day mungogo.
Iba anogomung nung Ato kilonser Narendra Modi-ia Tripura, Manipur aser Meghalaya nüburtem dang salem osang metetdaktsü.
“State jenjang anguba anogomung nung Meghalaya, Manipur aser Tripura nüburtem dang salem osang abener. Item state tem terenlok lenmang atema ni sarasademtsür,” ta pai sangdong ka ajanga lemsatep.
Agartala nung Tripura sorkar ketdangser kati, “State jenjang anguba anogo nung yangi Tripura Angh, Talhagata Roy-i sentong asem tenzükja liasü,” ta ashi.
1972 küm nungi tenzüka lenla balala nung Tripura state-i ajangzüktetba indang kaket ka Angh-i sayaja liasü.
Imphal nunga iba anogomung nung Chief Minister Okram Ibobi Singh aser Deputy Chief Minister Gaikhangam nati iba anogomung sentong nung jembia liasü.
“Manipur-i senotsü nung tebilemtsü kanga ajurudagi aser Centre sorkari teyari peria magütsür,” ta CM Singh-i nemjema ashi.
“State jenjang anguba mapang nungi tenzüka terenlok tsütsü Manipur-i mera kanga kara agidar aser linük den liromedema aotsü atema meranga inyaker,” ta paisa ashi.
Maneni Meghalaya nunga iba anogomung nung state tesem balala nung saisapong densema sentong balala ayonga agiogo.
State sports Minister Zenith Sangma, India tsür nüngtugu tsüngteper M.C. Mary Kom aser Bollywood star Milind Soman nungeria asemtepba sentong ka nung shilem agia liasü.
Tripura aser Manipur na ya January 21, 1972 nü state jenjang angu.
Meghalaya ya Assam den densema liasü aser North Eastern Region (Re-Organisation) Act, 1971 kübok state jenjang angu.