NE state asem shisabulutsü kecha mali: Rijiju

Shillong, August 21 (Agencies): Hokolbar nü Union Minister of State for Home, Kiren Rijiju-i, tawa Centre aser NSCN-IM tsüngda Yimjung Tenangzüktep nung Assam, Arunachal Pradesh aser Manipur state tem shisabulutsü kecha mali, ta shiogo.
Hokolbar nü Shillong nung osangbenertem den jembidang Union minister-i, tawa Centre aser NSCN-IM na tsüngda tenangzüktep agiba nung north east state asemi shisabulutsüsa kecha mali, aser state asem nüburtem taginüba apir iba framework renemer, ta ashi.
“Naga yimjung maparen nüngtem nung Centre-i Assam, Manipur aser Arunachal Pradesh akoksatsü memelatsü,” ta Arunachal Pradesh senso Rijiju-isa metetdaktsü.
Iba Yimjung mapatong nung ajemdaker chief minister asemi yimtenren nung tajangzük angutsü asoshi maongka agir ta Rijuju-i aitsüogo.
Tanü Shillong nung National Cooperative Development Corporation (NCDC)-i ayongba Cooperative Summit nung jembidang Rijiju-i, NE tesem nung nüburtem rongsenkettsüng jenjang aintsü asoshi NE state temi kidanger linüktem den shishilembatsüla, ta ayongzük.
“Iba tesem (NE) shilem 98 bo kidanger linüktem den sentaktepa lir aser Siliguri tsütsü shilem ana dang linük den sentaka lir, anungji iba tesem yagi item linüktem den shishilembabaren nung tesentaktep ayutsüji nüngdak,” ta paisa metetdaktsü.
Iba dak sentakba nung Customs aser Ministry of Trade & Commerce densema stakeholders tem den jembiogo, ta Rijiju-isa shisem.
Kidanger linüktem den shishilembatsü asoshi state shia nung tajemba agi port anabosa alitsüla, ta paisa ashi.