NE state tem den asüngdangyar ang NSCN-IM den tatembang tenangzükba agitsü

August 7, 2015 nü New Delhi nung Chief Minister TR Zeliang den Union Home Minister Rajnath Singh aser Home Minister Y Patton na angur.

New Delhi , August 7 (Agencies) : Opposition Congress nungi ola adokba mapang nung Centre sorkari NSCN-IM den tatembang tenangzükba ka magidang Nagaland den kidangsüa aliba state tem den asüngdangyatsü ta metetdaktsü.
Iba osang ya Union Home Minister Rajnath Singh-i Hokolbarnü Nagaland Chief Minister T R Zeliang dang ashi.
“NSCN-IM den tatembang tenangzükba magidang Manipur, Assam aser Arunachal Pradesh Chief Minister tem den tamasa asüngdangyatsü” ta Home Minister-i Zeliang dang ashi ta osang ka ajanga metetdaktsü.
Centre sorkari NSCN-IM dang parnoki Naga nunger aliba tesemtem ajak ka küma longjemtsü akhangbaji magizüktsü saka parnok asoshi autonomous district council amala tashi talila agütsütsü shiogo, ta Singh-isa metetdaktsü.
Congress sorkar aliba state asem – Manipur, Assam aser Arunachal Pradesh nungertemi Centre aser NSCN-IM tsüngda yimjung tenangzüktep magidang parnok dang asüngdangya masüba atema ola adokba mapang ka nung Home minister-i iba osang metetdaktsüogo.
Yashi Congress Tir, Sonia Gandhi-ia Narendra Modi’er sorkar aitsüogo.
Shitakba agibo NSCN-IM den tenangzüktep magidang tamasa north east state asem den asüngdangya asübatsü liasü, saka Modi’er sorkari parnok mezüngmeshiogo, ta Sonia-i aitsü.
Tanü senden nung Home Minister Rajnath-i Nagaland Chief Minister Zeliang dang Hombarnü tenangzüktep agiba nung framework ka renemogo aser taruba itatem nung olemtep tejangja agiba sülen ang tatembang telemtetba agitsü ta metetdaktsü.
Tanü nikongtsütsü Chief minister TR Zeliang-i National Security Advisor Ajit Doval aser Interlocutor Naga Peace Talk, R.N. Ravi den ajurutep.
Iba senden nung Ajit aser Ravi nati Naga yimten tebilemtsü atema framework renemba osang lemsatep.
Tanü TR Zeliang den Nagaland Home Minister Y Patton-i liasü.