NE state-temi Centre kübok jenjang balaka nung linür

Itanagar, October 11 (Agencies): Tenem nung kümteta aliba state-tem senden sentong ka “Sustainable Mountain Development Sumit-IV,” ta ser yangi Itanagar nung anogo asem nü agia monger yakanü tembangogo, aser iba senden ajanga Center sorkar dang tenem nung aliba state-tem ajanga linük nem tzü mopong tajung agütsüba asoshi teyari agütsütsüsa inyakyim kar latetdaktsüner ta asüngdangtsü lemtetogo.
“Iba ama teyari agütsüba ajanga tenem nung aliba state-tem nung tzü mopong meraksai terenlok mapa maneni shitak inyaka otettsü,” ta iba senden nung latetba pangzüng pongo nung shisema lir.
Iba kasa senden ajangasa center sorkar dang tenem nung aliba state-tem ya akhi ama jenjang balaka nung (special category states) ayutsü asoshi asüngdangtsü lemtet. Ano, kasa senden ajangasa tenem nung aliba state-tem nem teyari agüja aliba sentongtem melenshiba indang jangjashitsü asoshi center sorkar dang asüngdangtsü lemtet.
Iba senden ya “Sustainable Development Forum Arunachal Pradesh” teloki Integrated Mountain Initiative teyari agia ayongzükba liasü.
Center nung sentong tasen melenshia aoba den liromedema otettsü atema tenem state-tem nüngdak nung ajemdaker sentong yanglua terenlok mapa shitak inyaka otettsü asoshi inyakertem nem tangatetba agütsüba sentongtem yanglua angazüdaktsütsü, ta kasa senden nungsa lemtetogo.
Iba senden ajangasa UN agencies purtem danga item nüngdaktemji tongteta inyaktettsü asoshi parnoksasa mulungteta inyakdaktsüner ta telemtetba ka metetdaktsü. Kasa senden nungsa tenem-state-temi mapang mapang shia ‘State of the Mountain Report” renema agütsünüdaktsüner ta metetdaktsü.
” Iba ama reports jagi state-temi arem nung aliba rongsentem komaka amshitetter, itemji science aser technology inyakyim ajanga metettsü,” ta pangzüngisa metetdaktsü.
Iba senden nung adener MLA-temi speaker Nabam Rebia mendenbuba ser Arunachal Pradesh chapter of GLOBE India tentettsü asoshi mulungtepa renemogo.
Item MLA-tem jagisa center nung PRASAD scheme nung Bhalukpong-Bomdila-Tawang tourist circuit yanglutsü asoshi sentong nung enokdaktsütsü telemtetba agitsü.