NE state temi Mahila Protection officer shimtsüla: Maneka

Shillong, April 18 (Agencies): India Northeast tesem nungi tanurtem shibelenba osang jenti aliba nung ajemdaker tanü Women & Child Development Union Minister, Maneka Gandhi-i, timtem ajangshirtem aser police na tsüngda amalitepa inyaktsü atema taküm küm tatem tashi nung state temi yimtsüng shia nung special ‘mahila’ protection officer shimtsüla, ta metetdaktsüogo.
“Northeast tesem nungi tanurtem ozüng alema shibelenba jenti ataloker. Tanurtemji onoki  Kerala, Tamil Nadu nung angur aser aika Malaysia aser Thailand-i anir aoer. Iba ya tim masü,” ta Maneka Gandhi-i ashi.
“Iba tebilemtsü atema taküm küm tatem tashi nung state temi yimtsüng shia nung tetsür police ketdangser shimtsüla. SP temi  parnok shimtettsü aser training agütsütsü,” ta laisa ashi.
Yimtsüng nung tetsür ketdangser jagi tanurtem samaba, kinungburtemi kinungtsü dak teka sangshiba mesüra tetsür chanutem school-i meyokba osang agütsütsü, ta Union minister-isa metetdaktsü.
“State kar nungbo tetsür ka dang masütsü, saka tebur densema nisung ter tashi alitsü akok,” ta laisa shisem.
Northeast state temi Madhya Pradesh state nung ‘Shaurya Dal’ nungi tatishitsü agitsüla ta shia Union minister-i, “Yangji (Madhya Pradesh) ozüng alema inyakba kanga ajema kümogo, school nung tanurtem jenti kümogo, tesayurtema school-i junga aoer. Shirangba ajanga nisung asüba kanga ajema kümogo,” ta ashi.