NE state temi Utilisation Certificates tekaratiba nung agütsütsü tuyur

New Delhi, October 6 (Agencies) : Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr Jitendra Singh-i North-Eastern State tem dang parnoki Central fund amshiba dak sendakba maparen tekaratiba nung tembangba ta tetuyuba agütsü.
Mongulbarnü North Eastern Council (NEC) indang Executive Committee mezüng senden alidang Dr Jitendra Singh-i ashiba agi, state temi mapang shitak nung Utilisation Certificates magütsütetba, DPRs menur agütsüba aser pei lemzükba shilem sen magütsütetba ajanga terenlok mapatong aika metembangteti lir.
Itemji ajanga mapa metemtetba anendaka ayuba dang masü saka budget nung timtem ajurur aser mapang shitak nung mapa metemtettsüsa akümer, ta paisa ashi.
Iba senden nung Union Secretary, DoNER, Ameishing Luikham, Secretary, NEC, Ram Muivah, Northeast State ajak nungi Chief Secretary tem aser Member, NEC, C.K. Das nungertem aden.
Dr. Jitendra Singh-isa ashiba agi, NEC ya joko advisory body ka masü saka regional planning body ka kümogo.
Ministry of DoNER den tanga Ministry tem sentepa inter-ministerial committees tentettsü aser kasa mapang nung state balala nungi Delhi nung Resident Commissioner tem teyari agia mapatong balala inyaktsü, ta paisa metetdaktsü.
India’er “Act East” policy indang onük jembidang, Dr. Jitendra Singh-i ashiba agi, “Act East” takok ngua inyaktettsü atema mezüng North East nung international border nung aliba tesemtem tashi idaktsütsüla.
Iba dak sendakba nung Northeast nungi local produce tem arrtsü adena oa shishilembatsü, single window check-posts lapoktsü aser cross-border trade atema items listing maparen inyak nug ajungtsü, ta paisa shisem.
Dr. Jitendra-isa ashiba agi, NEC Secretary aser züngsemtemi full-time inyakyim nung office mapa inyakba ajanga tangbo Shillong nung aliba NEC headquarter mapa küma aoer.
NEC tenteter küm 40 jungnüa aruaka annual budget memelenshiba atema Dr. Jitendra-i Secretary NEC dang taoba mapang annual budget medemdangtsü aser taküm den itemji asadanger budget yanglushir Union Finance Ministry dangi abentsü tetuyuba agütsü.