NE state yimtibatem rail network agi sendakteptsü: Tir Kovind

New Delhi, January 31 (Agencies): 2022 tashi nung Sikkim, Mizoram, Manipur aser Nagaland yimtibatem rail network agi sendakteptsü ta tanü India Tir Ram Nath Kovind-i metetdaktsü.
“Sorkari meranga inyakba ajanga 2022 tashi nung Sikkim, Mizoram, Manipur aser Nagaland yimtibatem Rail network agi sendakteptsü” ta tanü Budget Session tenzüka Parliament indang Joint Session nung jembidang Tir Kovind-i iba osang lemsatep.
“Centre aser Assam sorkartemi tawa tu Bodo teloktem den otsüsütsü tenangzüktep ka agiogo aser iba ajanga küm 50 tashi Bodo tebilemtsü tembangogo. Ano, Tripura, Mizoram, Centre sorkartem aser Bru nunger tsüngda tenangzüktep agiba ajanga Bru nunger meyirjang aika taküm kümzükogo” ta paisa ashi.
“Centre sorkar taoba küm pungu tsüngda alima nung India linük jenjang ajungkettsüogo” ta Tir Kovind-isa shisem.
Iba ya World Bank-i ‘Ease of Doing Business’ ranking nung India jenjang 79 nung aliba nungi 69-i atuba nung ajemdaker pai jembi.
Asenoki linük taginüba kümzüka ayutsüla. Asen Constitution-i iba Parliament aser MP shia dang nungi linük taginüba aser teimla atema inyaktsütsü imlar, ta paisa metetdaktsü.
“Lungkak aitba tenüng amer ozüng alema mapa inyakba ajanga asen loktiliba aser linük tashimait kümdaktsür. Ozü sorkari olemtep aser o atsütepba ajanga democracy tashi itdaktsür ta akümer” ta Kovind-isa shisem.
Delhi kübok Jamia tesem nung lanur kati CAA anema lungkak aitertem dak injang khaloktsüba sülen anogo ka lir, Tir Kovind-i iba olen jembi.
“Taoba küm pungu tsüngda, sorkari tan putu ya Bharat’er putu asütsü atema tamendakdak yangluogo. Iba mapang ya Bharat atema kanga tongtipang lir” ta paisa shisem.
Union Budget ya Honibarnü Parliament nung benoktsü. Parliament indang session nung mezüngbuba shilemji February 11 nü tembangtsü aser tanabuba shilemji March 2 nungi tenzüker April 3 nü tembangtsü.