NE states nung anogo 100 tsüngda project 66 renema inyakogo

New Delhi, Rongjui/September 19 (Agencies): Satellite monitoring ajanga Development of North Eastern region (DoNER) Ministry-i Northeast state tem nung anogo 100 tsüngda sen crore 820.77 indang project 66 tashi tembanga inyakogo, ta sorkari metetdaktsü.
Brihostibarnü New Delhi nung osangbenertem den jembidang DoNER Minister, Jitendra Singh-i, tesüiba anogo 100 tsüngda Northeast nung project 110 atema sen crore 1699.69 lemzükja liasü, ta metetdaktsü.
“Item rongnungi sen crore 820.77 jenjang project 66 bo tembanga inyakogo. Sen crore 39.95 indang project trok tang teinyakdak lir,” ta Singh-i metetdaktsü.
Tesüiba küm ana tsüngda northeast nung project balala noklang shilem nung noklang inyakogo, ta shia Minister-i, “Tangbo onoki project ka atenzükdang senotsü shilem 10 dang agütsü tenzükogo. Work order agütsüba sülen ang shilem 40 agütsür aser tanüngba shilemjibo utilization certificates agütsüba sülen ang agütsür,” ta metetdaktsü.
“Iba yimya nung sen lemzüktsüba denji külemi junga mita ketdangsüa inyakba ajanga Northeast nung terenlok project balala inyakba nung kanga yariogo,” ta paisa asshi.
“Tangbo northeast state temi terenlok nükjidongtem ataloktsü atema yimtenren tashi lir, Tangbo state sorkartem ajak yakyaka lir,” ta pai ashi.
Tang mezüng Northeast nung Bamboo industrial park amenoktsü atema sorkari agizükogo, ta pai metetdaktsü.
“Ibaji (Bamboo industrial park) Assam nung Dima Hasao district kübok Manderdisa nung ali hectare 75 nung sen crore 50 indoka yanglutsü. Iba project ya 2021 küm March ita tashi nungbo tembangtsü nükjidong lir,” ta paisa shisem.