NE states nungi lanurtem nem railways nung mapa agütsütsü

Jorhat (Assam), September 07 (Agencies): Telungpur tebilemtsü aliba state tem nung lanurtem telungi aiba nokdangtsü atema lanurtem nem railways nung mapa agütsütsü atema sorkari maparen tasen ka tenzüktsü.
Mongolbarnü Jorhat nung osangbenertem senden ka nung jembidang Union Minister of State for Railways, Rajen Gohain-i, “Northeast, Jammu & Kashmir aser Maoist telungpur aliba state tem nungi lanurtem nem Railways nung mapa agütsütsü atema ozü sorkari mapatong tasen ka benoktsü renemdar,” ta metetdaktsü.
Minister-isa, “Mapa talangka Assam aser tanga NE state tem nungi lanurtem railway mapa nung sendoka liogo ta ni bilemer. Anungji iba tebilemtsü bentettsü atema ni telemtetba agia iba atema mera agitsü asoshi ni Centre den jembiogo,” ta metetdaktsü.
Union Minister akümba sülenbo Gohain-i tang mezüng Jorhat semdangogo, aser iba mapang nung pai NE nung tenzüktsü aliba scheme tasen kar metetdaktsü.
“Onoki Nagaon district nung Sunla nungi railway lenmang tasen kilometer 61 yanglutsü lemtetogo, koba ajanga Khumtai, Jorhat, Teok aser Jakaichook district tem Sivasagar den sentakteptsü,” ta paisa metetdaktsü.
“Onoki Jorhat nung Na Ali rail crossing nung three-lane railway over bridge yanglutsü, aser iba nungji sen crore 50 shi intoktsü. Mariani aser Jorhat na sendaktepa bypass tasen ka yanglutsü. Küm pongu tsüngda tanüker maliba railway crossings malitsü,” ta Gohain-isa shisem.
“Ministry-i NJP nungi Guwahati tashi railway tracks aser Jorhat, Tinsukia, Dibrugarh, Lumding aser Guwahati station tem tajungba küma yanglushitsü aser iba nungji sen crore 650 shi intoktsü,” ta paisa shisem.