Ne Taküm Samaba

Kechiaser shibai pei taküm soitnüdir aji samatsü aser shibai ni atema pei taküm samadir aji angutsü. Mathi 16:25.
Khristantem dang pei taküm samatsü ozüng agütsü. Ibai teti parnoki peisasa parnok taküm Tsüngrem aser Pa yimli asoshi agütsütsüla. Tsüngremi tenyaba mapa na asoshi tetsükdaktsü tulutiba kaji, na akaba nung ne temeten- ni kechi bena aru iba nung kü mulung kaa jangratema alitsü ni temeten kar ta bilembaji lir. Item osettemji Khrista nem agütsütsüji tasak masü aser tenla masü, nai lemang mashi ka nungi aji inyaktsü akok. Tejangjabaji ibai, koba tajung aser nai meimer ibaji na aser Tsüngremi mulungba tetsüngda nung noktaktsü akok.
Tatishitsü agi, ner tanur aser semchir anasa alibaji junger, Tsüngremi tenyaba mapa inyaktsü asoshi Pai na yimti kati mesüra alinük tanga kati Pa den aotsü mulunger. Anisüngzük teperi agitsüji junger saka aonung tiprong nung na ajatsü akok. Oset kar nungbo na temeten kar ta nai bilemtsü akok, saka Tsüngremi na akaba ajak Pa aser Pa nükjidong asoshi agüjang ta asüngdangtsü akok (Matt. 19:21).
Taküm tsütsü Yisui iba inyakyim abensaa sayu. Kotaker tesünep nung pelaa alitsü Pa temeten liasü. Aji saka idakji Pa temeten lir ta pai mesot, mesüra item ajak toktsübaji Pa tenla ta Pai mebilem (Fil. 2:5-11). Iba yongji Tsüngremi Pa kanga ulutsü aser teraksa lima ka dangi tekümtet bener aru.
Alimai nai agitsü kar nungbo temeten kar ta ajungshia lir asü? Nai ne taküm kümzüktsü meranger asü? Yamaji inyakdang Tsüngremi ne nem kadaktsünüba taküm samadar ta nai metetter ma ?