NE telungpurtemi rara anenra Centre-i olemtep akatsü mulunga lir: Rajnath

Shillong, March 21 (Agencies): Northeast tesem nung aliba telungpur teloktemi ozüng alema  inyakba anenra Centre-i parnok den olemtep akatsü mulunga lir, ta Hombarnü Home Minister Rajnath Singh-i ashi.
“Rara anener telok ajak den olemtep akatsü mulunga lir. Ni telok ajak dang rara anentsü mepishir,” ta Shillong nung Rajnath Singh-i osangbenertem dang ashi.
Northeast telungpurtem den centre sorkari yimjung olemtep akatsü mulunga lir mali ta asüngdangdang Home Minister-i iba telangzüba agüja liasü.
Meghalaya nung telungpur telok ana lir- HNLC aser ANVC. HNLC telok ya Khasi hills nung aser ANVC telok ya Garo hills nung kanga bulua lir. Centre sorkar ya tang NSCN-IM aser ULFA(pro-talks) tem dena telungpur telok aika den ken o tejembitak lir.
Aji oda süaka NSCN-K, Manipur nung PLA, Paresh Baruah-i aniba telok ULFA telungpurtem dena telok aikati tangatetba tajungi arua mejembir aser raratsü dang bilemer.
Rajnath Singh-i Shillong nung asür Sangma’er kibonga semdanga liasü.
Pai tesüiba mapang Lok Sabha Speaker asür P A Sangma’er kinungertem den March 21, 2016 nü ajurutepa asüko lemsatep.
Sangma’er kinüngertem den minute 20 ajurutepba mapang pai, asür kinungtsü Sorodini aser jabaso James o Conrad nunger den, pai tebu mapa tajung akhümtsübua aruba otsü jembia liasü.