NE tzümetsüng nung nisung 17 süogo

Guwahati/Agartala, Aami (June) 16 (Agencies): Assam nung tzüemetsüng tensa Honibarnü tamajungba kümogo aser lendong balala nung nisung pezü tashi asü.
Tang tashi nung Northeast kübok tzümetsüng lendong balala nung nisung 17 tashi taküm samaogo, ta ketdangsertemi ashi.
Taoba ghonda 24 tsüngda Tripura aser Mizoram nungbo tensa tajungba kümogo saka Manipur nunga tzümetsüng ajanga nisung ka asü.
Assam State Disaster Management Authority (ASDMA)-i ashiba agi taoba ghonda 24 tsüngda nisung pezü tashi tzümetsüng aser anentsüh lendong balala nung asü.
Assam kübok Hojai, Karbi Anglong East, Karbi Anglong West, Golaghat, Karimganj, Hailakandi aser Cachar district tem nung nisung lakh 4.25 shi tzümetsüng timtem ajanga kongshia lir, ta ASDMA-isa metetdaktsü.
Tang yimtsüng 716 tashi tzü agi metsüngbanga lir aser tsünüsenbongdak li hectare 3,292 tashi raksaogo, ta parnokisa shisem.
Bandarkhal aser Damchara station tsüngda anentsüh aluba ajanga Lumding-Badarpur section nung train senzüba anenogo, ta Northeast Frontier Railway Chief Public Relations Officer Pranav Jyoti Sharma-ia ashi.
District pungu nung relief camps aser distribution centres 213 tashi lapoker teyari agütsüdar aser nisung 1,00,010 jenoka lir, ta ASDMA-isa metetdaktsü.
Guwahati yimti nunga tesem asem tashi nung anentsüh aluogo saka nisung yiruyibong asüba osang kecha mali.
Tang Jorhat nung Brahmaputra, Cachar nung Barak aser Karimganj nung Badarpurghat ayongtem nung tzü ‘danger mark’ alema yimdar.
Manipur nunga Imphal West district nung nisung ka asü ta tanü ketdangsertemi ashi.
Tanep nungi Imphal nung tzünglu aruba ajemogo saka Thoubal, Imphal West aser Bishnupur lenden district tem nungbo tensa mejungi lir, ta ketdangsertemisa metetdaktsü.
Yashi Imphal West district nung angopur ka ayong nung arakset aser nisung lakh 1.8 shi tzümetsüng agi kongshia lir, ta Relief and Disaster Management Department-i ashi.
Yashi tashi nung Manipur nung kiojen 22,624 tashi raksaba osang bushitetogo aser relief camp tasen 48 lapoktsü atema mapa inyakdar, ta parnokisa shisem.
Tripura nunga tzümetsüng timtem ajema kümdar saka nisung 40,000 dak tema relief camp 189 nung jenoka lir, ta osang ka ajanga ashi.
Mizoram nunga tzümetsüng tensa tajungba kümogo aser Tlawng o Langkaih ayongtem nung tzü ajema kümdar, ta ketdangsertemi metetdaktsü.
Lunglei district kübok Tlawng aser Langkaih ayongtem nung tzü ajema kümdar saka kibong 500 shi ka talidak maka lir, ta Disaster Management and Rehabilitation department ketdangsertemi ashi.