NE ya ozüng alema arurtem lidaktsüba tesem mekümdaktsütsü

Kohima, Monupii (May) 21 (TYO): North East ya ozüng alema aruba bendangertem lidaktsüba tesem ka mekümdaktsütsüla, ta tanü Naga Students’ Federation (NSF)-i metetdaktsü.
Centre-i Citizenship (Amendment) Bill 2016 benokba anema North East Students’ Organisation (NESO)-i noktaker aser tanü NSF-ia NESO pusema Raj Bhavan, Kohima kima nung lungkak aitba sentong ka agi.
Lungkak aitba sentong nung kaketshir noklang aikati shilem agi aser NSF tatong tir Imtiyapang Imsong-i o jembidang ashiba agi “Ozüng alema arurtem aser talisa Bangladesh nungertemi North East tesem nung timtem tulu bentsür arua lir.”
“Citizenship (Amendment) Bill 2016 ji ‘anti North East’ lir aser Centre sorkari ozüng alema arurtem nem senso agütsütsü melena parnok anientsü atema ang inyaktsüla. North East state tem ya ozüng alema arurtem bendenba tesem ka ama mebilemtsüla” ta Imtiyapang-isa ashi.
NSF-i Nagaland Governor P B Acharya ajanga Joint Parliamentary Committee on Citizenship (Amendment) Bill 2016 nung Chairman MP Rajendra Agarwal dangi memorandum ka zülu.
NSF-i memorandum nungji Citizenship (Amendment) Bill, 2016 anema onük aika zülua lir.
NESO den külemi NSF-i India sorkar dang Bangladesh nungi tanen makai nisungtem aruba indang khuret lemsatep. Parnok aruba ajanga North east tesem aser linük kübok tanga tesemtem indang litsü nung takoksa bentsür arur, ta memorandum nungsa shia lir.
NESO-i mapang shia National Register of Citizens 1951 yanglushitsü aser National Electoral Census nungi ozüng alema aruba nisungtem indang tenüng agientsü atema shiyonga arur. NESO-isa NE nung lisopurtem temeten kümzükba ayutsü atema Assam Accord aser tanga accord tem takok ngua mapa inyaktsü atema nenshiyonga arur, ta NSF-isa ashi.
NESO aser iba nung züngsem aliba teloktemi mepishiaka July 19, 2016 nü Lok Sabha nung Bill ka benok aser iba mapaji August 12, 2016 nü Joint Parliamentary Committee nem nungloktsü, ta NSF-isa shidi nung shia lir.
Iba Bill yagi Citizenship Act, 1955 yanglushinür aser Afghanistan, Bangladesh o Pakistan nungi ozüng alema arurtem nem tamangba yimsü nung ajemdaker senso agütsünür, ta parnokisa metetdaktsü.
“NSF ya kaketshir tongti telok ka aser iba teloki lanurtem aser kaketshirtem atema noktaker. NSF-i Nagaland, Manipur, Assam, Arunachal Pradesh aser tangalen aliba Naga nunger ajak atema inyaker, anungji onoki Citizenship (Amendment) Bill, 2016 magizüker aser iba Bill tang aser teti atema meyipa agitsü akhanger” ta NSF indang memorandum nungsa shia lir.
Parnokisa JPC Chairman dang shisakaa iba bill ya linük anemba bill ka ta züngoktsü atema mepishiogo.
Tanü lungkak aitba sentong agiba sülen NSF tir Kesosul Christopher Ltu aser speaker Amonbo Zeliang nati anir tanishirtemi Raj Bhavan nung Governor nem memorandum ji agütsü.