NE ya shisaluyimdak tiyongtsü ka kümdar

Kohima, Oct. 10 (Agencies): Shisaliok senmang tajung liaka Northeast (NE) nungi kaketshirtemi kaketshisatsü nung jenjang temaba asoshi tesem adener tangalen ang college bushir, ajisüaka Centre aser state napronglai shisaliok indang project tasentem sangdongba ajanga NE nung shisaluyimba tsütsü lenmang tasen lapoktsü.
NE tesem nung tang terenlok kadagi aser tanabuba sector ji shisaluyimba asütsü.
Tawa Mokokchung District kübok Chuchuyimlang yimtsüng nung Human Resource & Development Union Minister, Smriti Irani-i Nagaland nung tang mezüng Tata Institute of Social Science (TISS) yanglutsü atema lung azüngtsüogo.
Ano benoka aliba centre temji Institute of Social Work, Institute of Agriculture Development, Institute for Teachers’ Training, Institute for Vocational Studies & Training, Cultural Resource Centre for Naga Art & Crafts lir, iba dak alia Gandhi Museum ka aser Gandhian & Nagaland/North Eastern affairs Study Centre project-a benoka lir.
Iba sentong nung jembidang Irani-i, institute tasen amenokbaji lanurtem tarutsü tia tajungba nükjidong nung inyaker, ta ashi.
Iba campus ya Chuchuyimlang yimtsüngi tenlaba ali acre 232 nung yanglutsü aser iba dak sentakba nung Nagaland Chief minister T. R Zeliang-i, “Sen mesüra telatetba kecha makai ali acre 232 tashi tenla agüja tatishitsü tajung sayuba atema ni village council aser Chuchuyimlang yim sensotem nem tenüngsang agütsür. Tesüiba küm 60 tashi nenoki Gandhi Ashram anepalua renlokdaktsüba ama nenoki iba academy tasenba ya-a anepalutsü ta ni imlar,” ta ashi.
Centre-isa iba ama mesükba project aika Northeast nung sangdongogo, item rongnung Assam nung All India Institute of Medical Sciences (AIIMS), Nagaland nung Indian Institute of Science Education and Research (IISER) aser Arunachal Pradesh nung Film Production, Animation & Gaming atema Centre ka densema lir.

You must be logged in to post a comment Login