NEDA nung teloktemi BJP den pilatsüla: Congress

Guwahati, February 28 (Agencies): North East Democratic Alliance (NEDA) nung züngsema aliba teloktemi BJP den külemi madentsüla ta AICC general secretary Luizinho Faleiro-i ashi.
BJP party president Amit Shah-i Citizenship (Amendment) Bill posema jembiba sülen kodaser Meghalaya chief minister Conrad Sangma-i NEDA nung BJP den külemi adener? ta Faleirio-i asüngdang.
“Amit Shah-i Conrad Sangma dak metetsümonga mapa tamajung inyak. Anungji Conrad-i ibaji shisadanger asü masü? mesüra pai miima Bill posemer sernung tema nung magizüker ta sayur?” ta AICC lennirisa asüngdang.
Amit Shah-i Citizenship Bill yanglutsü ta jembiba sülen kechiba NEDA nung dena aliba party temi BJP den külemi lir, ta paisa ashi.
NEDA nung adenba teloktemi maongka angutsü mechi nung Northeast nungertem mashioktsütettsü. Parnok dak tangatetba tajung ali ka süra, 2019 küm BJP-i Centre nung tanaben sorkar kümra Bill meyipa bener arutsü ta Amit Shah-i jembiba anogo nungsa parnoki BJP den tesentaktep pilatsüba liasü, ta Faleiro-isa shisem. Faleiro ya Meghalaya, Tripura, Arunachal Pradesh aser Mizoram state tem atema Congress party in charge lir. Paisa ashiba agi party president Rahul Gandhi-i tetuyuba agütsüba ama ‘onoki Rajya Sabha nung Citizenship (Amendment) Bill mebenokdaktsü’
RSS aser BJP indang alizüngji Northeast nung parnok mulung inyaktsüba lir aser BJP president Amit Shah ya tekong meranga noktakba nisung ka lir. Pa ya NEDA nunga chairman lir, ta Faleirio-isa aitsü.
“Northeast nung alirtemi parnok sobaliba, maitsü aser inyaksangshitem nung akangakanga sota lir aser Congress party-i ibaji angateta lir aser akhümtsübur. Onoki Northeast nunger sobaliba, maitsü aser inyaksangshitem kümzüka ayutsü” ta paisa metetdaktsü.
Northeast nung alirtemi Bill anema noktakba metetaka aser Rajya Sabha nung iba Bill mebenoktetaka BJP president Shah-i Lakhimpur nung sentong ka nung jembidang ‘2019 Lok Sabha elections nung BJP-i tanaben sorkar kümra Bill meyipa bener arutsü’ ta ashi.