Neeraj & Hima Asian Championships Team nung züngoksemogo

New Delhi, Metsüremi/March 21 (Agencies): Taruba ita Doha nung Asian Championships asayatsü aliba nung India team lenitsü asoshi nüngtugu javelin thrower Neeraj Chopra shimogo. Kasa mapang nung asemteper Hima Das-a iba asayamung nung asayatsü asoshi shimogo.
National record bena alisang Mohd. Anas (400m), Jinson Johnson (800m and 1500m), Dharun Ayyasamy (400m hurdles), Avinash Sable (3000m steeplechase), Tajinder Pal Singh Toor (shot put) aser Annu Rani (javelin throw) den Dutte Chand (200m) team nung züngoksemogo.
Tejaswin Shankar (high jump) aser M Shreeshankar (long jump) na kuli balala ajanga team nung maniok aser Seema Antil (discus throw) aser Arpinder Singh (triple jump) nati World Championships atema renemshitsü asoshi taküm iba asayamung nung shilem magitsü asoshi telemtetba agiogo.
NADA-i temelaba agütsüba sülen Sanjivani 10,000m race atema team nung züngoksemogo.
Arishi küm 22 tain Jadahav nem NADA-i tenokdangba magütsü aser lai tawa tembangba Federation Cup nung 10,000m race gold medal koktetogo.
Arishi küm 21 tain Neeraj shibai 2017 küm iba asayamung nung gold medal ngua liasü, pa Athletics Federation of India-i Federation Cup nung shilem magitsü asoshi temelaba agütsü. Pa tang South Africa nung training agidar.
Kasa mapang nung Hima tatidang agütsüba ajanga ita ka training magi aru aser la training magiba ya Indian Grand Prix series aser Federation Cup nung sayuogo.
Indian GP tasembuba leg nung Hima jenjang pezübuba nung tembang. Lai alizüng secong 55.19 nung atong, koba la career nung tamajungtiba asütsü.
Arishi küm 19 tain asayar yagi Federation Cup nung gold medal angu saka AFI-i lateta toktsüba Asian Championships qualifying standard (52.75) metongtet. Lai iba asaya nung alizüng second 52.88 nung tonga liasü.
AFI tir Adille Sumariwalla-i ashiba agi, AFI puri mezüngbo la tatidang magütsükdaktsünü saka la tezü atangba reprangteta tatidang agütsütsü asoshi temelaba agütsü.
AFI selection committee-i shimba asayar 40 rongnung asayar 11 ano April 13 nü Patiala nung tendangshitsü.
Maneni asayartem 51 akümtsü akok kechiyong AFI-i tetsür aser tebur 4x100m relay races atema selection trial ka agitsü.
High jump asayar Tejaswin dak sendakba nung Sumariwalla-i ashiba agi, pa Indian Grand Prix series aser Federation Cup nung shilem magiba ajanga meshim. Pa asayamung anogo aser pa tatidang anogo mesütetpba indang shia AFI dangi shidi züluogo. Pa Kansas State University nung scholarship ngua oa züngdar. Pai tawa Big 12 collegiate meet nung 2.28m jokteta liasü.