Neerja Bhanot shilem agitsü maongka anguba atema pelar: Sonam Kapoor

September 20, 2015: Bollywood actress Sonam Kapoor-i ‘Neerja Bhanot’ taküm otsü nung ajemdaker yangluba film nung la ama shilem agiogo.
Neerja ya ‘Pan Am’ tayimtsü attendant ka liasü aser kiralongrartemi iba tayimtsü hijack asüba mapang lai passenger tem kümzüktsü merangdang la asü.
Sonam Kapoor-i, la indang taküm otsü ajanga linük nung aiürtem aika ajungmesotsü, ta osangbenertem dang ashi.
Mumbai nungi New York tashi senzüba Pan Am flight nung Bhanot ya flight attendant tongti liasü, aser 1986 küm Karachi nung kiralongrartemi iba tayimtsü ya agiba mapang la kahset. Lai tasü itta passenger tem kümzüktsü meranga liasü.
India nunger tasütait atema highest peacetime military award, Ashok Chakra angur rongnung tanutsütilaji la lir.
“Iba ya film küma yangluba ajanga, tasü aitba shisangdaktsütsü ta ni bilemer. La (Neerja) tasu-aitba atema Arjuna Award angu, aser iba award angur rongnung la tanutsütila aser tetsür rongnungbo lai dang angu. Ibaji tenüng asangtsü tetemsü ama ni bilemer. Ni asoshia iba ya ajungmesoba otsü ka lir. Ni kanga moa-ogo,” ta arishi küm 30 Sonam-i osangbenertem dang ashi.
Ram Madhvani-i tang mezüng direct asüba film nung ya actress tain Shabana Azmi-i Neerja (Sonam) tetsü shilem agir.