NEET, JEE tatidang küm nung anaben agitsü

New Delhi, Chiteni (July) 7 (Agencies): Kaketshirtem lenjii arua Honibarnü Human Resource Development Ministry-i sangküm nungi JEE (Main), NEET (UG) tatidang küm nung anaben agitsü ta metetdaktsü.
“Kaketshirtemi iba ya khangyonga arur. Küm nung khen tatidang agir aser iba mapang koda masü timtem kar ajurura, kaketshirtem küm ka akoksar. Iba jagi küm nung anaben tatidang agitsü lemtet” ta HRD Minister, Prakash Javadekar-i ashi.
Linük nung CBSE ajanga NEET, JEE, NET tatidangtem acha-ayanga agir saka item tatidang National Testing Agency ajanga ketdangsüa agitsü ta Javadekar-isa ashi.
Kaketshirtemi JEE (Main) aser NEET (UG) shimtsü akok aser küm nung anaben tatidang agütsütettsü aser admission atema ‘best score’ agitsü akok ta paisa metetdaktsü.
HRD Ministry ajanga ashiba agi JEE (Main) ji January 2019 aser April 2019 nung agitsü. Külen, NEET (UG) February 2019 aser May 2019 nung aser UGC-NET ji December 2018 nung agitsü.
National Testing Agency (NTA)-i JEE (Main), NEET (UG) aser UGC-NET ketdangsüa agiba den Common Management Admission Test (CMAT) aser Graduate Pharmacy Aptitude Test (GPAT) parnokisa agitsü.
Tang nungi item tatidangtem leak-proof kümdaktsütsü atema computer-based format nung agitsü.
NTA-i agitsüba tatidangtem indang time table ji ministry indang website nung upload asütsü. IIT temi JEE-Advanced exam maneni ketdangsüa agitsü, ta Minister-isa metetdaktsü.
“Syllabus, tasüngdangbatem, oshi shimba den exam fee kecha memelenshi saka tatidang agiyimji computer-based asütsü” ta Javadekar-isa ashi.
Union Cabinet-i November 2017 nung NTA ya higher educational institutions atema entrance tatidang agitsü atema autonomous & self-sustained testing organization ka asütsü mulunga agizük.
NEET counselling tanabuba shilem atema registration process tang tagidak lir. Candidate temi Chiteni (July) 8, 2018 nung mesüra matongdang tenüng agütsütsüla. Iba sülen Chiteni (July) 9, 2018 anepdang 10:00 ako nungi nikongdang 5:00 ako tashi kaketshirtemi fill & lock choices sütettsü.
Seat allotment indang tanabuba shilem indang result ji Chiteni (July) 12, 2018 nü metetdaktsütsü aser counselling atema menden lemzüktsüba sülen candidate temi tenüng meyipa magitettsü mesüra metoktsütettsü.