NEET tatidang mezüngbubaren May 1 nü agitsü

New Delhi, April 29 (Agencies): National Eligibility cum Entrance Test (NEET) tatidang mapang atsülangtsü atema Centre sorkari mepishia liasü, ajisüaka Hokolbarnü Supreme Court (SC)-i iba temepishibaji magizük, anungji NEET tatidang mezüngbuba shilemji May 1, 2016 nü agitsü.
Centre temepishiba ken o magizüktsü ta shia SC-i, NEET dak sentakba nung Court-i iba dak alia joko tetuyuba magütsütsü ta oshidang agütsü.
Brihostibarnü SC-i taküm NEET tatidang agitsü atema lenmang lapoktsü aser Centre, Central Board of Secondary Education (CBSE) aser Medical Council of India (MCI)-i benokba agizüka liasü.
May 1 nü NEET tatidang mezüng shilem agitsü alibaji methinentsü ta shia SC-i, “Onoki tetuyuba agütsüogo. Tatidangji agidakjang,” ta ashi.
“NEET ajanga MBBS aser BDS courses atema tatidangji lateta aliba ama agitsü,” ta SC-i ashi.
Tanep Centre-i SC dang mezüngbuba shilem tatidang anogo atsünglangtsü atema benoka liasü. Attorney General-i SC dang NEET tatidangji shilem ana nung masü saka khenyongi dang July 24 nü agitsü mepishia liasü.