NEFIP-i CAB agientsü akhanger; Oct 3 nungi longkak aittsü

Kohima, Rongjui/September 26 (TYO): Northeast nung aliba state tenet (Sikkim maden) indang tentet tuluba North East Forum for Indigenous People (NEFIP)-i Citizenship Amendment Bill (CAB) 2016 tangsa agiensü atema takhangba agütsüogo.
Brihostibarnü SIRD Hall, Kohima nung osangbenertem den jembidang NEFIP Secretary General, Robertjune Kharjahrin-i, “Bodhbarnü Kohima nung NEFIP Central Executive Council mezüngbuba senden amendang bangzüng tenet renema iba takhangba (CAB agientsü) agütsür,” ta metetdaktsü.
Pai ashiba agi, iba senden nung Assam, Arunachal Pradesh, Meghalaya, Manipur, Mizoram, Nagaland aser Tripura state atem nungi lisopurtem temeden kümzüktsü atema inyakertem dena liasü.
CAB tangsa agientsüla, ta takhangba agüja NEFIP-isa Union Home Minister, Amit Shah aser Assam Finance Minister & North East Democratic Alliance Convenor, Himant Biswa Sarma nati, November ita nung taruba Parliament senden amemdang Union sorkari iba bill tanaben benoktsü, ta jembiba o aitsüogo.
Senden nungsa, tamalen Citizenship Amendment Bill 2016 anema August 9 nü Ato kilonser nem agütsüba bangzüngtem nungi masetshitsü bangjemogo, ta paisa ashi.
NEFIP-isa CAB anema North East Region tesem ajaklen October 3 nü nüburtemi longkak aittsü, aser ibaji CAB anema campaign tetenzüker asütsü, ta pai metetdaktsü.
NEFIP-i Northeat region nung lisopurtem nem CAB ajanga takoksa balala indang angatetdaktsütsü sentong lir, ta pai metetdaktsü.
“Senden nungsa, Centre mesüra state sorkari lisopurtem matsüngdang oshi kar benoktsü atema merangra magizüktsü aser tawa Home Minister-i linük tesem ajungalen Hindi oshi National language ama jembitsü mepishiba anema nokdaker ta bangjemogo,” ta pai metetdaktsü.
NEFIP-isa NE state nung aliba State Legislative Assembly nung Union sorkar dang United Nations Declaration on the Rights of Indigenous Peoples (UNDRIP) mapa küma inyaktsü atema mepishitsü asoshi bangzüng ka renemtsü atema mepishitsü lemtet.
Kasa senden nung NEFIP Tir, Ningthouja Lancha aser Speaker Jones Ingti Kathar na den state balala nungi züngsemtem liasü.
Lancha-i, kodang onoki iba mapatong tenzükdir onoki state nung tongti tentettem den amalitepa inyaktsü aser item ajakji democratic yimya nung asütsü, ta ashi.
Paisa, “Nisung aikati CAB ya akechiar memetet, anungji nüburtem nem iba ya angatetdaktsütsüji onok teinyaktsü mapa ta bilemer. NEFIP-i nüburtem dang iba (CAB) indang angatetdaktsütsü atema kaket ka adoktsü aser oshi balala nung meyipzüktsü merangtsü,” ta metetdaktsü.