NEFIP-i CAB magizüker; Amit Shah-i nangzükba

Dimapur, September 11 (TYO): North East Forum for Indigenous People (NEFIP)-i Citizenship (Amendment) Bill, 2016 magizüker ta tanü sangdong ka nung metetdaktsüogo.
Tang lateta aliba CAB, 2016 ya ozüng alema arurtem senso kümdaktsütsü merangba mapa ka lir aser Arrla 14 anema lir, ta NEFIT-i sangdong ka nung metetdaktsü.
Union Home Minister Amit Shah-i Guwahati nung ‘Centre-i CAB tanaben bener arutsü aser iba ajanga Inner Line Permit (ILP) den metsükteptsü’ ta jembiba sülen anogo ana lir NEFIP-i iba osang metetdaktsü.
“Amit Shah-i Citizenship Amendment Bill ajanga northeast nung lisopurtem indang maitsü, sobaliba aser inyaksangshi kümzüka ayuba ozüngtem nung mekongshitsü ta ashi” ta NEFIT media secretary Khuraijam Athouba-i sangdong nung shia lir.
“Centre-i yanglunüba CAB ajanga Arrla 371 mesüra Northeast nunger maitsü kümzükba ozüngtem asoshi timtem majurutsü ta shiogo. Centre-i ozüng alema arurtem Assam nungi dang masü saka linük ajunga nungi meindoktsü ta nangzükogo” ta paisa ashi.
Amit Shah-i northeast nung lisopurtem kümzüka ayutsü ta nangzükbaji NEFIT-i pelaa agizüker. Ajisüaka, CAB ajanga northeast nung ozüng alema arur nem India senso agütsütsü meranger asü nung, pai temeli ana dener tiyazü jembir ta onokibo bilemer, ta NEFIT-isa ashi.
Centre-i tenangzükba tazünglatem ajanga Northeast nung lisopurtem manisatsü atema mepishir, saka onok indang khuret süoki ia agizüktsü ayongzüker, ta NEFIP-isa metetdaktsü.