NEFR nung Chief Engineer-i TR Zeliang den ajurutep November ita nungi Dimapur-Zubza rail project tenzüktsü akok

Dimapur, September 22 (TYO) : Tan ita tetenzüklen Chief Minister TR Zeliang-i Railway Minister den ajurutepba sülen Mongulbarnü Anil Kumar, Chief Engineer (construction) North East Frontier Railway, Malegaon-i TR Zeliang den pa indang residential office nung ajurutepogo.
Iba senden nung Chief Engineer-i Chief Minister dang Nagaland nung railway line project ana- Dimapur-Zubza rail line aser Dimapur-Tizit rail line indang osang lemsatep.
November 2015 tetenzüklen nungi Dimapur-Zubza rail project kübok Rangapahar nungi Sukhovi section indang mapa tenzüktsü akok aser lung azüngba sentong ka Sukhovi nung agitsü ta tanü senden nung telemtetba agi.
Dimapur-Tizit line yanglutsü atema sen crore 4000 nüngdaker aser iba atema India sorkari temelaba ano magütsü lir ta Chief Engineer-isa ashi.
Tanü TR Zeliang-i Dhansari nungi Karong rail project asentenshitsü atema takhangba agütsüba maneni lepshia metetdaktsü. 1997 nung Nitish Kumar Union Railway Minister inyakdang iba mapatong atema Karong nung lung azünga yutsü ta Nagaland chief minister-isa shisem.
Centre sorkari “Act East Policy” mapa inyakba nung Dhansari nungi Karong rail project ajanga Imphal-Moreh aser South East Asia sendakteptsü, ta paisa shisem.
Iba mapatong indang osangtem pai bushiteptsü aser Nagaland sorkari Railway Ministry den jembitsü atema pai osang bushitetba ajak agütsütsü ta Chief Engineer Anil Kumar-i tanü TR Zeliang dang nangzük.
Iba senden nung Neiba Kronu, Parliamentary Secretary Planning & Coordination, Evaluation & Monitoring aser Lalthara Advisor & Sr. Principal Secretary to CM na aden.