NeGPA kübok Mobile Apps Development sentong ka Kohima nung agi

Kohima, June 09 (Agencies): National e-Governance Plan in Agriculture (NeGPA) kübok Mobile Apps yanglutsü sentong ka APC Conference hall nung 2017, June 07 anogo Parliamentary Secretary for Agriculture, Y.M. Yolow tongti tesemdanger süa lapoktsüogo.
Iba sentong nung APC aser Commissioner & Secretary, T. Imkonglemba Ao IAS, mendenbuba asü aser pai sentepa alir pelashishia agizükba den külemi NeGPA indang teratet lokdi dang rasa-a ashi.
Tongti tesemdanger-i NeGPA kübok Project for Development of Mobile Apps lapoktsü aser 2017, May 16 nung MOU ka zülutepba Department of Information Technology & Communication Agriculture & Allied department atema Mobile App pongu, committee ajanga bushiteta agütsüogo, ta ashi.
Technology nung renlokba ajanga asenok ajak anasatepa kümogo aser iba terenlok nung tajung aser tamajung keta lir, anungji item Mobile App ajanga Agriculture & Allied department nung tajangzük angutsü lenmang bushitsüla, ta iba sentong nung tongti tesemdanger-i ajungshi.
Nagaland rongsenketsüng ya aluyimba nung ajemdaker lir aser lokdi balala yamaji aluyimba nung ajemdaker lir, aser technology tasentem amshia aluyimba ajanga yanglutetba aser adokdaktsüba oset ajungkettsü aoshi Government of India-i NeGPA ajanga sentong balala bushir, ta Commissioner & Secretary ITS, Er. K.D. Vizo-ia ashi.
Department of Agriculture aser Information Technology & Communication tsüngta 2017, May 16 nung MOU zülutepba nung ajemdaker Mobile App pongu yanglutsü asoshi maparen tenzükogo, ta Er. K.D. Vizo-i shisem.
Iba sentong nung tepela o Director of Agriculture, Helie Rupre-o-i jembi. Iba sentong nung Agriculture & Allied department aser IT & C department nungi ketdangsertem arua aden.