Nehru-Gandhi kinungertem rongnung Rajiv dang nisung tajung liasü : Swamy

Patna, March 26 (Agencies): BJP lenir Subramanian Swamy-i Deobarnü taoba ato kilonser Rajiv Gandhi tenüng sanga liasü.
Pai ashiba agi, Nehru-Gandhi kinungertem rongnungi Rajiv ya dang nisung tajung liasü. Pai Hindu nunger asüngsashiba nung teyari agüja liasü.
Rajya Sabha MP Swamy-i taoba ato kilonser-i Doordarshan nung nüngtugu tarnunger otsü ‘Ramayana’ serial sayutsü asoshi temelaba agüja liasü aser Ayodhya nung Ram temple shibanger aliba sarasademtsü asoshi lapoktsü.
“Congress nung lenirtemi kanga anemaka Rajiv (Gandhi)-i national television Doordarshan nung nüngtugu India nung tarnunger otsü Ramayana sayutsü asoshi temelaba agütsü,” ta Naidu-isa ashi.
Supreme Court-i Ayodhya dak sendakba nung mangatettep aliba telok dang okadak masü parnok tsüngda nung iba ken o angatetteptsü asoshi teteyuba agütsüa liasü. Iba dak sendakba nung Swamy-i telemtetba tajung kati arutsü asoshi temolunglema bilemba lemsatepa liasü.
“Congress pur soseta asütsüba tejangraba nung aliba amai ajiteter… asüpila agitsütsü asoshi onok lir,” ta Election nung Congress pur tamakok anguba dak sendakba nung jembidang Naidu-isa ashi.