Neiba Kronu-i Intangki National Park kümzüka ayutsü mepishir

Kohima, August 24 (TYO): Intangki National Park kümzüka ayutsü atema khuret bena Environment, Forest & Climate Change Minister, Neiba Kronu-i tanü Peren district nung national park meketa aliba yimtsüng pezü den senden amen.
Tanü anüngdang Intangki National Park nung Zeliangrong Baudi Nagaland dena Beisumpuikam, Jalukiekam, Jalukiezangdi aser Manglumukh yimtsüngtem nungi Goan Burahs, Village Council Chairmen aser taintem den senden amendang, Kronu-i “Nagaland nung arem aser shirurutem talubosa lir aser iba ya ajanga dang asenok World Forest Map nung züngoktsü’ ta ashi.
Intangki National Park tasazükji 202 square kms lir aser iba ya Nagaland nung Kaziranga ama kümdaktsütsü akok. Ibaji ajanga temeket aliba yimtsüngtem rongsenkettsüng jenjang ajungketba dang masü saka eco-tourism ajunga state ajangzüktsü, ta paisa metetdaktsü.
Iba asoshi yimdaklirtem aser department külemi longjemer Nagaland nung National Park ka dang aliba kümzüka ayutsüla, ta Kronu-isa ayongzük.
Beisumpuikam aser Forest Department tsüngda Land Exchange maparen ano metembangtetba atema Minister-isa ashiba agi, iba onük ya küm aika metembangteti arur saka yimtsüng nung lennirtemi Park kümzüka ayutsü atema hai haura kaa agizüktsü mepishir.
Senden nung Zeliangrong Baudi Advisor Akhang Kamei-ia o jembidang, “National Park atsünga agitsü merangba maparen ajak nokdangtsü aser temeket aliba yimtsüngtemia iba telemtetba agizükogo aser department den akokba tashi yaritepa arudar” ta metetdaktsü.
Department aser Beisumpuikam yimtsüng tsüngda tekaratiba nung Land Exchange indang telemtetba agitsüla aser iba jagi mapa tashitaitba inyaka otettsü, ta Kamei-isa ayongzük.
Deputy Conservator of Forest, INP, Heuneilung-ia “Park kümzüka ayutsüji tongtipangtiba mapa lir saka forest patrol personnel peria mali” ta ashi.
Paisa, Beisumpuikam o Department tsüngda ali melenteptsü atema olemtep agiba tatemlen kati arudar, ta metetdaktsü.
Sendenji Conservator Forest Peren & Director INP Y M Jami menden sür agi.
Principal Chief Conservator of Forest, I Panger Jamir-i meina tanü Minister Kronu-isa Nagaland Zoological Park, Rangapahar, Dimapur semdang aser idangji Zoological Park Director, Sentichuba Aier-i Minister dang zoo nung nüngdaktem osang lemsatep.