Neiba Kronu-i Meluri semdang

Dimapur, April 26 (TYO): Planning & Coordination, Land Revenue and Parliamentary Affairs Minister, Neiba Kronu-i tanü Primary Health Centre (PHC) Meluri semdang aser Administration, Security Forces, Pochury Hoho o public lennirtem den COVID-19 indang osang lemsatep.
Minister Kronu-i Pochury nungertemi administration, security forces aser NGOs den amalitepa yariteptsü aser lennirtemia party telemsa kecha melii meimchir atema inyaktsü mepishia metetdaktsü.
Paisa nübortem dang mapa inyaktsü sobaliba tenzüktsü den aluyimba mapa inyaktsü ayongzük.
Asenoki India dak dak memetaloki, asenok sasa züsenteta alitsü merangtsüla, ta paisa shisem.
Nagaland nung tongtipang nüngdakbatem peria dang lir anungji nübortem iba atema petsaprong masütsüla, ta Kronu-isa metetdaktsü.
Myanmar aser Manipur den arrtsüa aliba Meluri nung alirtemi linük ajunga shibangba mapang timtem aika ajurur, ta Pochury Hoho President Chukekhu Nyusou-ia ashi.
Ajisüaka, nübortemi aser administration amalitepa inyakba ajanga iba wara anema raratsü, ta paisa shisem.
Iba senden nung ADC Chubatemjen aser par staff, MO Dr. Chukhusie aser par telok, Pochury Hoho President Chukekhu Nyusou aser lennirtem aden.