Neiba Kronu-i PDA candidate nem vote agütsütsü ayongzük

Dimapur, Monupii (May) 23 (TYO): Pfutsero jila nung PDA-i Lok Sabha by-election atema nüboyimba sentong agidang Phek District PDA coordination committee Convenor aser Planning & coordination & Land Revenue Minister, Neiba Kronu-i nübortem dang state sorkar den yariteptsü ayongzük.
Naga yimten tebilemtsü atema noktaktsü asoshi Tokheho Yepthomi temsüa lir aser pa ya yimsüsür tejen ka lir, ta Neiba Kronu-i ashi.
NPF-i tiyazü jembiba nung mamangtsüla aser nübortemi Lok Sabha Election nung sorkar den yariteptsüla, ta paisa ayongzük.
PDA sorkar akangakanga noktaka lir aser tashi kechaia meloksadaktsütettsü. Chief Minister Neiphiu Rio lenisüba kübok state sorkar tiptema dang inyaka arudar aser kümsük tembanga inyakba den ano talila inyakloka aotsü, ta paisa ashi.
State sorkari terenlok mapatong aika inyakdar aser manifesto nung shia aliba ama kechisarena ajaklen terenlok bener arutsü, ta Neiba-isa metetdaktsü.
Sentong nung NDPP Working President aser Ex MLA, Nuzota Swuro-ia nübortem dang tejakleni arutsü aser sorkar den yaritepa terenlok bener aruba nung shilem agitsü atema ayongzük.
Taoba Minister & Advisor NPP Deo Nukhu aser Vivolie Kezo natia PDA candidate atema nüboyimtsü.
Sentong nung mendenji 16-Pfutsero A/c NDPP tir Dingulo Khutso liasü, CRC Pfutsero pastor Solhou Koza-i temoatsü meshia sarasadem, NDPP General Secretary, Central Mr. Neikhrole Khalo-i tepela o jembi aser Rüyosayi Chuzho-i tenüngsang agüja tembang.