Neiba Kronu-i ‘Vision 2030 document’ atema inyakyim balala sayatsü

Hombarnü ‘Vision Document 2030’ atema websites aser social networking sites sayatsüba sentong nung Parliamentary Secretary, Neiba Kronu (tiyong) den taoba Chief Secretary, Alemtemshi Jamir (achiji) aser tang teinyakdak Chief Secretary, Pankaj Kumar na külemi agiba noksa angur.

Kohima, June 6 (TYO) : Linük Temzüng nung Arla 371(A) ya Naga nunger atema temoatsü ka lir saka iba Arla ya asenoki timi mamshii arur, ta Parliamentary Secretary, Neiba Kronu-i tanü ashi.
Iba Arla ajanga Naga nunger nem ali aser rongsen kibur temeten agütsür. Nagaland nung ali kiburji sorkar masü saka nübortem lir, ta pai ashi.
“Ajisüaka, terenlok mapa inyakba nung Arla 371 (A) ya tetsüdaktsü mekümdaktsütsüla,” ta tanü Neiba Kronu-i Nagaland sorkar indang ‘Vision 2030 document’ atema social media balala sayatsüdang ashi.
“Tesüiba mapang ali kibur onük ajanga terenlok mapa inyakba nung tetsükdaktsü ajuruogo aser iba nung Medical College ama mapatong tongtipangtem dena liasü. Iba jagi state sorkari ali kibur indang onük maitdaktsütsü atema tarutsü nungbo ali songjen alizüktsü atema telemtetba agiogo,” ta paisa shisem.
‘Vision 2030 document’ ji July 31, 2016 tashi nung yanglutsü atema state sorkari lemtetogo aser iba ya ajanga state renloktsü aser sentong atongba nung teyari tulu angutsü nükjidong lir, ta Neiba-isa metetdaktsü.
Vision Document nung sorkar department temi bilemba dang masü saka nübortemi bilemba adentsü. Asen state nung ibala mesükba document kecha maliba agi Externally Aided Projects mesüra FDI tem arutsü arentaker. Anungji, iba Vision Document ji pungmang ka dang masütsü saka asangsang nung mapa küma inyakba Document ka asütsüla, ta paisa ayongzük.
Parliamentary Secretary-isa shisashirtem, lanurtem, Hoho tem, Mulungtet teloktem, civil society temi ‘Vision 2030 document’ yangluba nung yariteptsü mepishia metetdaktsü.
Tanü Nagaland Chief Secretary, Pankaj Kumar aser ‘Vision 2030 document’ atema Expert Group, Convener, Alemtemshi Jamir na lia Parliamentary Secretary, Neiba Kronu-i Nagaland vision20130.in ta ser website ka, facebook account ka, whatsapp number 8415856752 ka aser Nagaland vision2030@gmail.com ta ser email account tem lapoktsü.
Kija mesüra teloktemi Convener, Nagaland Vision 2030, Capital Convention Centre, New Secretariat Area, Kohima – 797003 dangi tezüluba nunga Vision Document atema tebilembatem agütsütsü akok.
‘Vision 2030 document’ atema tebilembatem June 30, 2016 tashi nungbo agütsütsüla, kechiyong ibaji adoktsü atema mapang nüngdaker aser tagütsürtem indang tenüng iba vision document nung enoksemtsü, ta tanü sentong nung Alemtemshi-ia metetdaktsü